Top 10 News : 01) अनेक राज्यांमध्ये सोमवारी मुसळधार; हवामान विभागाचा इशारा

देशातील अनेक राज्यांमध्ये सोमवारी मुसळधार ते अतिमुसळधार पावसाचा इशारा हवामान विभागाने दिलाय. नागालँड, मणिपूर, मिझोरम, त्रिपुरा, पश्चिम बंगाल आणि सिक्कीममध्ये अतिवृष्टीची शक्यता असून कोकण, गोवा, मध्य महाराष्ट्र, दिल्ली, पंजाब, हरियाणा, उत्तर प्रदेश, बिहार, छत्तीसगड, ओडिशा आणि उत्तराखंडसह अनेक भागांतही जोरदार पावसाचा अंदाज व्यक्त करण्यात आलाय. अनेक ठिकाणी विजांचा कडकडाट, मेघगर्जना आणि ताशी 50 ते 70 किमी वेगाने वादळी वारे वाहण्याची शक्यता आहे. दक्षिण भारतातील काही भागांमध्येही थंडरस्क्वॉलचा इशारा देण्यात आलाय. नागरिकांनी अनावश्यक प्रवास टाळावा, नदी-नाल्यांपासून दूर राहावे आणि स्थानिक प्रशासन व हवामान विभागाच्या सूचनांचे पालन करण्याचे आवाहन करण्यात आलेय. (Top 10 News)

02) “राजकारणातून रिटायर व्हावंसं वाटतं…”, पंकजा मुंडेंचं भावनिक वक्तव्य चर्चेत

भाजप नेत्या आणि राज्याच्या मंत्री पंकजा मुंडे यांच्या एका वक्तव्याची सध्या जोरदार चर्चा सुरू आहे. परळी महामार्गावरून येताना राजकारणातून रिटायर व्हावंसं वाटलं, असे त्या म्हणाल्या. मात्र सभास्थळी उपस्थित नागरिकांचा उत्साह पाहून पुन्हा नव्याने काम करण्याची प्रेरणा मिळाल्याचे त्यांनी स्पष्ट केले. ही लाल दिव्याची गाडी माझ्यासाठी नाही, तर जनतेच्या विकासासाठी आहे, असेही त्यांनी सांगितले. यावेळी त्यांनी पंतप्रधान नरेंद्र मोदी यांच्या कार्यशैलीचेही कौतुक केले. अमेरिकेच्या दौऱ्यावरून परतल्यानंतर तब्बल साडेआठ तासांची बैठक घेऊन प्रत्येक मतदारसंघाचा आढावा घेतल्याचा अनुभव त्यांनी सांगितला. मोदींनी देशालाच आपला परिवार मानल्याचेही पंकजा मुंडे यांनी नमूद केले. (Top 10 News)

03) ‘माझ्या काळजाचे तुकडे डोळ्यासमोर वाहून गेले’; पुरात पत्नीसह दोन चिमुकल्यांचा मृत्यू

यवतमाळ जिल्ह्यातील दहेली गावाजवळ कुपटी नदीवरील पुलावर घडलेल्या भीषण अपघातात एकाच कुटुंबातील तिघांचा मृत्यू झालाय. मुसळधार पावसामुळे पुलावरून वाहणाऱ्या पाण्याचा अंदाज न आल्याने अविनाश खंडारे यांच्या कारला पुराच्या पाण्याने वेढले. पत्नी माधवी, मुली प्राची आणि सांची यांना वाचवण्याचा प्रयत्न करत असतानाच पाण्याच्या प्रचंड लोंढ्यामुळे त्यांचा हात सुटला आणि तिघेही वाहून गेले. अविनाश यांनी कारची काच उघडून बाहेर पडत झाडाच्या फांदीचा आधार घेत तब्बल चार तास जीवाची झुंज दिली. बचाव पथकाने बोटीच्या साहाय्याने त्यांची सुटका केली. या हृदयद्रावक घटनेने संपूर्ण परिसर शोकमग्न झालाय. (Top 10 News)

04) पंढरपूर वारीतून एसटीला ४१ कोटींहून अधिक उत्पन्न

आषाढी वारीनिमित्त पंढरपूरसाठी चालवलेल्या विशेष बससेवेमुळे महाराष्ट्र राज्य मार्ग परिवहन महामंडळाच्या उत्पन्नात मोठी वाढ झालीय. परिवहन मंत्री प्रताप सरनाईक यांनी दिलेल्या माहितीनुसार, यंदा ५,५०० विशेष बसमधून ९ लाख २४ हजार ७३८ भाविकांनी एसटीने प्रवास केला. यात्रेदरम्यान २१ हजार ५२७ फेऱ्या पूर्ण करण्यात आल्या असून, त्यातून ४१ कोटी १८ लाख रुपयांचे उत्पन्न मिळाले. गेल्या वर्षाच्या तुलनेत यंदा उत्पन्नात सुमारे ५ कोटी ३० लाख रुपयांची वाढ झाली आहे. पुणे, मुंबई, नाशिक, नागपूर, छत्रपती संभाजीनगरसह राज्यभरातून विशेष बससेवा उपलब्ध करून देण्यात आली होती. लाखो वारकऱ्यांची सुरक्षित सेवा करणे हीच विठ्ठलसेवा असल्याची भावना प्रताप सरनाईक यांनी व्यक्त केलीय. (Top 10 News)

05) केरळमध्ये पावसाचा कहर! ८ जणांचा मृत्यू, ८ बेपत्ता

केरळमध्ये सुरू असलेल्या मुसळधार पावसामुळे पूर, दरडी कोसळणे आणि पाणी साचण्याच्या घटनांनी मोठे संकट निर्माण झालेय. या नैसर्गिक आपत्तीत आतापर्यंत ८ जणांचा मृत्यू, ८ जण बेपत्ता तर १३ जण जखमी झाल्याची माहिती राज्य सरकारने दिलीय. पावसामुळे २७ घरे पूर्णपणे उद्ध्वस्त, तर १९६ घरांचे अंशतः नुकसान झालेय. बाधित भागातील ५,७९२ नागरिकांना २०९ मदत छावण्यांमध्ये सुरक्षित हलवण्यात आलेय. मुख्यमंत्री व्ही. डी. सतीशन यांनी मृतांच्या कुटुंबीयांना आणि नुकसानग्रस्तांना सर्वतोपरी मदतीचे आश्वासन दिलेय. दरडीप्रवण भागातील नागरिकांनी सतर्क राहण्याचे आवाहन करण्यात आले असून पूर ओसरलेल्या भागांत स्वच्छता मोहीमही युद्धपातळीवर सुरू करण्यात आलीय. (Top 10 News)

06) ‘जगाच्या भल्यासाठी हल्ला रद्द’; ट्रम्प यांची मोठी घोषणा

अमेरिकेचे अध्यक्ष डोनाल्ड ट्रम्प यांनी इराणविरोधातील संभाव्य लष्करी कारवाई तात्पुरती स्थगित करण्याची घोषणा केलीय. ट्रुथ सोशलवरील पोस्टमध्ये त्यांनी सांगितले की, इराण आणि मध्य-पूर्वेतील काही देशांनी आराखडा करारासाठी पुढाकार घेतल्याने “जगाच्या भल्यासाठी हल्ला रद्द करत आहे”, मात्र लवकर करार होणे आवश्यक असल्याची अट त्यांनी घातली. प्रस्तावित करारात होर्मुझची सामुद्रधुनी पूर्णपणे खुली ठेवणे आणि इराणचा आण्विक धोका संपवणे यांचा समावेश असल्याचे ट्रम्प यांनी म्हटले. दरम्यान, इराणनेही कठोर इशारा देत अमेरिका किंवा इस्रायलने हल्ला केल्यास त्यांच्या महत्त्वाच्या ऊर्जा पायाभूत सुविधा आणि तळांवर जोरदार प्रत्युत्तर दिले जाईल, असा इशारा दिलाय. (Top 10 News)

07) Google Pixel 10 वर 12 हजारांहून अधिक फ्लॅट डिस्काउंट! नवीन Pixel 11 आधी भन्नाट डील

Google च्या आगामी 12 ऑगस्ट हार्डवेअर इव्हेंटपूर्वी Pixel 10 स्मार्टफोनवर मोठी सवलत जाहीर करण्यात आलीय. भारतात 12GB+256GB व्हेरिएंटची लॉन्च किंमत ₹79,999 होती, मात्र सध्या तो Amazon वर ₹67,969 मध्ये उपलब्ध असून ₹12,030 ची थेट सूट मिळतेय. जुना फोन एक्सचेंज केल्यास ₹20,550 पर्यंत अतिरिक्त लाभ मिळू शकतो. या फोनमध्ये 6.3-इंच 120Hz डिस्प्ले, Tensor G5 प्रोसेसर, 12GB RAM, 4970mAh बॅटरी, 30W फास्ट चार्जिंग आणि 48MP ट्रिपल कॅमेरा सेटअप देण्यात आलाय. उत्कृष्ट कॅमेरा, AI फीचर्स आणि स्वच्छ Android अनुभवासाठी Pixel 10 हा आकर्षक पर्याय ठरत असून, Pixel 11 लाँचनंतर त्याची किंमत आणखी कमी होण्याची शक्यता आहे. (Top 10 News)

08) रॉयल एनफिल्डचा नवा विक्रम! 3 मिनिटांत संपल्या ‘या’ महागड्या बाईक्स

रॉयल एनफिल्डच्या Shotgun 650 X Rough Crafts या लिमिटेड एडिशन बाईकने विक्रीचा नवा विक्रम केलाय. जगभरात केवळ 100 युनिट्स तयार करण्यात आली होती, त्यापैकी 25 बाईक्स भारतासाठी राखीव होत्या. बुकिंग सुरू होताच अवघ्या 3 मिनिटांत सर्व युनिट्स विकल्या गेल्या. तैवानच्या प्रसिद्ध कस्टम बाईक डिझायनर विन्स्टन ये यांच्या सहकार्याने तयार झालेल्या या बाईकमध्ये ड्युअल-टोन ब्लॅक फिनिश, हाताने बनवलेल्या गोल्ड स्ट्राइप्स, प्रीमियम लेदर सीट्स आणि युनिक क्रमांकाची फ्युएल टाकी अशी खास वैशिष्ट्ये आहेत. यात 648cc पॅरलल-ट्विन इंजिन, 47hp पॉवर आणि 52.3Nm टॉर्कसह 6-स्पीड गिअरबॉक्स देण्यात आला असून, प्रीमियम बाईक्सची वाढती क्रेझ पुन्हा एकदा अधोरेखित झालीय. (Top 10 News)

9) कंगना-हृतिक वाद पुन्हा पेटला! ‘आगीत तेल ओतणं थांबव’, कंगनाचा हृतिकला टोला

अभिनेत्री आणि खासदार कंगना रणौत आणि अभिनेता हृतिक रोशन यांच्यातील जुना वाद पुन्हा चर्चेत आलाय. सोशल मीडियावर “हृतिकची माफी मागा” हा ट्रेंड सुरू झाल्यानंतर हृतिकने, “सत्य योग्य वेळी समोर येईल,” अशी प्रतिक्रिया दिली. त्यावर कंगनाने इंस्टाग्राम स्टोरीद्वारे प्रत्युत्तर देत, “आगीत तेल ओतणं थांबव आणि योग्य गोष्टींना पाठिंबा दे,” असा टोला लगावला. तसेच महिलेविरोधात ट्रोलिंगला विरोध करण्याचे आवाहनही तिने केले. या नव्या वादाची सुरुवात CJP संदर्भातील एका वक्तव्यावरून झाली. दरम्यान, २०१६ मधील कथित रिलेशनशिप, आरोप-प्रत्यारोप आणि न्यायालयापर्यंत पोहोचलेल्या प्रकरणाचीही पुन्हा सोशल मीडियावर जोरदार चर्चा सुरू झालीय. (Top 10 News)

10) नॅपकिनवर भारताचा अपूर्ण नकाशा; ग्लासगोतील रेस्टॉरंटवर लव्हलिना बोरगोहेन भडकली!

ग्लासगो राष्ट्रकुल स्पर्धेत पदके जिंकणाऱ्या भारतीय खेळाडूंसाठी ‘मिस्टर सिंग इंडिया’ या रेस्टॉरंटमध्ये मेजवानी आयोजित करण्यात आली होती. मात्र, तिथे दिलेल्या नॅपकिनवर ईशान्य भारत आणि जम्मू-काश्मीरचा नकाशा अपूर्ण छापल्याचे पाहून ऑलिम्पिक विजेती लव्हलिना बोरगोहेन आणि बीएफआय अध्यक्ष अजय सिंह यांनी तीव्र संताप व्यक्त केला. “भारताचा प्रत्येक भाग महत्त्वाचा असून तो नकाशात दाखवलाच पाहिजे,” असे सांगत त्यांनी चुकीचे नॅपकिन तात्काळ हटवण्याचे निर्देश दिले. या स्पर्धेत भारताने १३ सुवर्णपदकांसह एकूण ३९ पदके जिंकून चौथे स्थान पटकावले आहे. (Top 10 News)