US-Iran War – अमेरिका आणि इराणदरम्यानच्या वाटाघाटींच्या दुसऱ्या फेरीची अद्याप अधिकृत घोषणा झालेली नाही. पण ही चर्चा सोमवारी इस्लामाबादमध्ये होणार अससल्याने पाकिस्तानमध्ये जय्यत तयारी केली जाऊ लागली आहे. या चर्चेसाठी इस्लामाबादमध्ये येणाऱ्या परदेशी पाहुण्यांच्या सुरक्षेसाठी सुरक्षाविषयक उपाययोजना केली जाते आहे. इस्लामाबादबरोबर रावळपिंडीमध्ये कडेकोट बंदोबस्त ठेवला जाऊ लागला आहे. रावळपिंडीभर १० हजारांहून अधिक पोलीस कर्मचारी तैनात करण्यात आले असून ६०० हून अधिक तपासणी नाके उभारण्यात आले आहेत. संभाव्य चर्चेच्या पार्श्वभूमीवर राजधानीतही सुरक्षा मानकांची अंमलबजावणी केली जात आहे. US Iran War: रविवार मध्यरात्रीपासून नूर खान हवाई तळ आणि इस्लामाबाद आंतरराष्ट्रीय विमानतळाच्या आसपासचे अनेक संवेदनशील भागांची नाकाबंदी केली जाणार आहे. नूर खान विमानतळ रावळपिंडीत आहे. तर इस्लामाबाद आंतरराष्ट्रीय विमानतळ पंजाब प्रांताच्या अटोक जिल्ह्यात आहे. पण इस्लामाबादला जाणारा रस्ता रावळपिंडी जिल्ह्यातून जातो. त्यामुळे रावळपिंडीमध्ये कडेकोट सुरक्षा ठेवली जाते आहे. या मार्गावर पाकिर्ंगलाही अनुमती असणार नाही. रावलपिंडीमध्ये ड्रोन, कबुतर उडवणे आणि हवेत गोळीबार करण्यावर संपूर्ण बंदी घालण्यात आली आहे. उच्चस्तरिय विदेशी पाहुण्यांच्या विमानांच्या सुरक्षेसाठी ही खबरदारी घेण्यात आली आहे. रावळपिंडीमध्ये, विशेषतः नूर खान एअरबेस आणि इस्लामाबाद विमानतळाच्या परिसरात रेड अलर्ट जाहीर करण्यात आला आहे. वाढीव दक्षतेचा भाग म्हणून अधिकारी छतांवरही तैनात केले जातील. न्यू टाऊन, सादिकबाद आणि चकलाल पोलीस ठाण्यांच्या हद्दीत विशेष सुरक्षा उपाययोजना लागू करण्यात आल्या आहेत. अधिकाऱ्यांनी या भागांतील रेस्टॉरंट मध्यरात्रीपासून पुढील सूचना मिळेपर्यंत बंद ठेवण्याचे आदेश दिले आहेत. याव्यतिरिक्त, उद्याने, बाजारपेठा, बँका आणि सर्व प्रकारची दुकाने व व्यापारी संस्था देखील बंद राहतील. इस्लामाबाद जिल्हा प्रशासनाने राजधानी शहरातील सार्वजनिक आणि अवजड वाहतूक स्थगित करण्याची घोषणा केली आहे. रावळपिंडी प्रशासनानेही अशाच सूचना सोशल मीडियावर दिल्या आहेत. इस्लामाबाद आणि रावळपिंडी येथील अनेक विद्यापीठांनी रविवारी शैक्षणिक वेळापत्रकात बदल जाहीर केले. शैक्षणिक तास ऑनलाइन होतील व परीक्षा पुढे ढकलल्या गेल्या आहेत. पुढील सूचना मिळेपर्यंत रावळपिंडीमधील मुलामुलींची सर्व वसतिगृहे बंद ठेवण्यात आली आहेत. ट्रम्प पाकिस्तानात येण्याची शक्यता इराणबरोबरच्या शांतता करारावर स्वाक्षरी करण्यासाठी आपण स्वतः पाकिस्तानात जाऊ असे अमेरिकेचे अध्यक्ष डोनाल्ड ट्रम्पयांनी म्हटले आहे. त्यामुळे सुरक्षा व्यवस्थेमध्ये कोणतीही त्रुटी राहू नये, यासाठी रावळपिंडी प्रशासन जय्यत तयारीला लागले आहे. अमेरिकेच्या प्रशासनाकडून मात्र तशी कोणतीही अधिकृत माहिती दिली गेलेली नाही. त्यामुळे ट्रम्प यांच्या आगमनाची केवळ एक अफवा असू शकते. दुसऱ्या फेरीतल्या चर्चेमध्ये अपेक्षा… अमेरिका आणि इराणमधील थेट चर्चेची पहिली फेरी दिनांक ११ आणि १२ एप्रिल रोजी इस्लामाबादमध्ये पार पडली होती. मात्र त्या चर्छेमधून कोणताही ठोस निष्कर्ष निघू शकला नव्हता. आता दुसऱ्या फेरीच्या चर्चेमधून तरी काही ठोस निष्कर्ष निघेल, अशी पाकिस्तानला आशा वाटते आहे. यासाठीच या दुसऱ्या फेरीचा घाट घातला जातो आहे. दरम्यान पाकिस्तानचे पंतप्रधान शहबाज शरीफ यांनी सौदी अरेबिया, कतार आणि तुर्कीयेचा दौरा केला. तर लष्कर प्रमुख फिल्ड मार्शल जनरल आसिम मुनीर यांनी ३ दिवसांचा इराणचा दौरा करून महत्वाच्या मुद्द्यांवर सहमती घडवण्याचे प्रयत्नही केले.