Kalewadi : नसरापूर येथे साडेतीन वर्षांच्या बालिकेवर अत्याचार करून तिला ठार मारले. आपल्या शहरात देखील काळेवाडीमध्ये तीन वर्षांच्या चिमुकलीवर लैगिंक अत्याचार झाले. याबाबत तक्रार दाखल करण्यासाठी लोकप्रतिनिधी गेले असता त्यांना साक्षीदार आणा असे सांगण्यात आले. सुदैवाने ती मुलगी वाचली मात्र, तिच्या घरच्यांच्या मनाला काय वेदना झाल्या असतील. आपल्या घरात अशी घटना घडलेली असतानाही पोलिस प्रशासन गंभीर नाही. लोकप्रतिनिधींना देखील या शहरातील पोलीस प्रशासन दाद देत नाही. तर सर्वसामान्यांचे काय? आम्ही कोणाकडे न्याय मागणार? असे म्हणत नगरसेवकांनी महापालिकेच्या सभेत संताप व्यक्त केला. मंगळवारी एप्रिल महिन्याची तहकूब सभा पार पडली. सभेच्या अध्यक्षस्थानी महापौर रवि लांडगे होते. भोर तालुक्यातील नसरापूर येथे तीन वर्षांच्या मुलीवर अत्याचार करून तिला ठार मारण्यात आले. त्याच्या दुसऱ्या दिवशी चाकणमध्ये एका चिमुरड्यावर अनैसर्गिक अत्याचार करत ठार केले. यावरून बोलत असताना नगरसेवकांनी पोलिस प्रशासनावर संताप व्यक्त केला. पिंपरी चिंचवड शहरामध्ये देखील अशा घटना घडत असताना पोलिस प्रशासन याबाबत गंभीर नसल्याचा आरोप करत नगरसेवकांनी पिंपरी चिंचवड पोलिसांचे वाभाडे काढले. नगरसेविका नीता पाडाळे यांनी पंधरा दिवसांपूर्वी काळेवाडी परिसरामध्ये एका तीन वर्षांच्या चिमुकलीवर झालेल्या अत्याचाराचा मुद्दा उपस्थित करत आपल्या घरातील मुली देखील सुरक्षित नसल्याचा आरोप केला. त्या म्हणाल्या, काळेवाडीत एका मुलीवर अमानुष अत्याचार झाला आहे. त्याबाबत पोलिसांनी तक्रार दाखल न करता साक्षीदार आणण्याचा सल्ला दिला. नगरसेवक विनोद नढे म्हणाले, पिंपरी चिंचवड पोलीस हफ्तेखोरीमध्ये व्यस्त आहेत. तीन वर्षांच्या मुलीवर अत्याचार झाला. त्यानंतर तिच्यावर वायसीएम रुग्णालयात उपचार सुरू होते. सुदैवाने ती मुलगी मृत्यूच्या दाढेतून बाहेर आली आहे. याबाबत गुन्हा दाखल करण्यासाठी आम्ही गेलो असता तेथील पोलिसांचे वर्तन चांगले नव्हते. वरिष्ठ पोलीस निरीक्षक राजेंद्र बहिरट आहेत. त्यांची तातडीने चौकशी करण्यात यावी. अशाप्रकारे गांभीर्य नसलेले आणि संवेदना बोथट झालेल्या पोलिसांची गरज नाही. आज शहरातील प्रत्येक पानटपरीवर गांजा, ड्रग्ज मिळत आहेत. पोलीस फक्त हफ्तेखोरीमध्ये व्यस्त आहेत. नगरसेवक विश्वजीत बारणे म्हणाले, कासारवाडीमध्ये ५० किलो गांजा पकडण्यात आला. कूठून येत आहे हे सर्व याची चौकशी झाली पाहिजे. त्या नराधमाला चौकात ठेचून मारा नसरापूर येथील घटनेवरून नगरसेवकांनी सभागृहात संताप व्यक्त केला. तसेच त्या नराधमाला फाशी देण्यापेक्षा ठेचून मारा अशी मागणी केली. नगरसेविका वैशाली घोडेकर म्हणाल्या, या अत्याचार करणाऱ्या नराधमाला फाशीपेक्षा क्रूर शिक्षा देण्याची गरज आहे. फास्ट्रॅक कोर्टात तीन महिन्याने सुनावणी होते. या खटल्यात दररोज सुनावणी घेऊऩ तातडीने शिक्षा द्यावी. अनुराधा गोरखे म्हणाल्या, कायद्याने सुटका न देता १५ दिवसात शिक्षा झाली पाहिजे. अशा नराधमाला चौकात ठेचून मारलं पाहिजे. आमच्या ताब्यात द्या आम्ही मारतो. रविना अंगोळकर म्हणाल्या, प्रत्येक आई घाबरलेली आहे. ज्या वयात आपण हात चांगले धु असं शिकवतो तिथं त्यांना कोणाकडून चॉकलेट घेऊ नको असं सांगायला लागत आहे. वर्षा जगताप म्हणाल्या, असा अन्याय करणाऱ्यांचा महाराजांनी चौरंग्या केला होता. आपल्या शहरात देखील अशा घटना घडतं आहेत. भयं इथलं संपत नाही. गुड टच बॅड टच शिकवतो पण पालिकेच्या वतीने आता मुलांनाही धडे दिले पाहिजे. विरोधी पक्षनेते भाऊसाहेब भोईर म्हणाले, अशा दुर्दैवी घटना घडल्यानंतर चर्चा होते. यापलिकडे आपल विश्व नाही. उपाययोजना काय करणारयावर चर्चा झाली पाहिजे. पिंपरी चिंचवड पोलिसांची बैठक घेत शहरातील उपाययोजना काय हा प्रश्न त्यांना करावा लागेल. शाळांमधील ८० टक्के सीसीटीव्ही बंद आहेत. स्पेशल हेल्पलाइन चालू करावी. बऱ्याच पोलीस स्टेशनंला दखल घेत नाहीत. आपल्या संवेदना बोथट नको असे म्हणत पोलिसांसोबत बैठक लावण्याची सूचना केली. तर आपल राज्य बिहार होईल शिवसेनेच्या नगरसेविका सुलभा उबाळे म्हणाल्या, एक मे यादिवशी लैंगिक अत्याचार झाला. याला जबाबदार कोण? समाजभान नाही राहील. मी त्या कुटुंबाची भेट घेण्यासाठी गेले होते. सर्वसाधारण कुटुंब आहे. आईच डोळे लाल, कडा सुजल्या होत्या. तो नराधम यापूर्वी जामीनावर सुटला आहे. दक्षता समित्या कागदावर आहेत. असेच सुरू राहिल तर आपल्या राज्याचा बिहार होईल. परप्रांतीय आले आहेत. भाडेकरू राहत आहेत त्यांचे रेकॉर्ड पाहिजे. या सगळ्या सूचना महापालिकेच्या वतीने पोलिसांना द्या. ‘ही घटना दुपारच्या सुमारास घडली. त्या बालिकेचे नातेवाईक पोलिसांकडे आले नाहीत ते थेट रुग्णालयात उपचारासाठी घेऊन गेले. रात्री रुग्णालयातील डॉक्टरांनी घडलेल्या घटनेची माहिती पोलिसांना दिली. त्यानुसार पोलिसांनी रुग्णालयात जाऊन माहिती घेत गुन्हा दाखल केला. आरोपीलाही तात्काळ अटक केली. गुन्ह्यची चौकशी पूर्ण झाली असून दोषारोपपत्र तयार करण्याचे काम सुरू आहे.’ – राजेंद्र बहिरट, वरिष्ठ पोलीस निरीक्षक, काळेवाडी पोलीस ठाणे. Crime News : पोटच्या मुलीचा कटरने गळा चिरला; शाळेच्या निकालात फेरफार : संतापाच्या भरात मृतदेह घरातच जाळला