देऊळगावराजे : दौंड तालुक्यातील देऊळगावराजे परिसरात धक्कादायक आणि संतापजनक घटना सोमवार (दि.४) उघडकीस आली. हडगळेवस्ती येथे एका वडिलांनी ९ वर्षांच्या मुलीची निर्घृण हत्या केली. पुरावा नष्ट करण्यासाठी क्रूर पित्याने पत्रावजा घरात मुलीचा मृतदेह जाळून टाकला. त्यानंतर याची वाच्यता केल्यास मुलाला जीवे मारण्याची धमकी दिली. या घटनेने दौंड तालुकयात खळबळ उडाली आहे. आरोपीला गावातच पोलिसांनी अटक केली. आरोपीला न्यायालयात हजर केले असता त्याला पोलीस कोठडी सुनावली आहे. अनामिका चव्हाण (वय ९), असे मृत्यू झालेल्या शाळकरी मुलीचे नाव आहे. शांताराम चव्हाण (वय ३३, रा. देऊळगावराजे, ता. दौंड), असे खून केलेल्या पित्याचे नाव आहे. पोलिसांकडून आणि घटनास्थळावरून मिळालेल्या माहितीनुसार, हडगळेवस्ती येथे गेल्या सात वर्षांपासून पारधी समाजातील चव्हाण कुटुंबीय राहत आहे. आरोपी शांताराम चव्हाण याला पहिल्या पत्नीची अनामिका आणि संस्कार ही मुले आहेत. वस्तीवर आरोपी शांताराम हा तिसऱ्या पत्नीसमवेत राहत होता. या मुलांचे शिक्षण देऊळगावराजे येथे सुरू आहे. आरोपीच्या पहिल्या पत्नीची मुलगी अनामिका (वय ९) व तिचा भाऊ संस्कार (वय १०) यांचे नुकतेच शाळेचे निकाल लागले होते. निकालातील क्रमांकात फेरफार केल्याच्या कारणावरून आरोपी शांताराम याने दारूच्या नशेत व संतापाच्या भरात घरातच मुलगी अनामिका हिच्यावर झाड तोडण्याच्या कटर मशीनने गळ्यावर आणि हातात वार केला. यातच तिचा जागीच मृत्यू झाला. संतापाने पेटून उठलेल्या आरोपी शांताराम चव्हाण याने अनामिका हिचा मृतदेह साडीमध्ये गुंडाळून पत्र्याच्या घरात पेटवून दिला. त्यानंतर घर पेटविल्याचे भासवून खून आणि पुरावा नष्ट करण्याचा प्रयत्न केला. पुढील तपास दौंड पोलीस करीत आहे. मद्याच्या नशेत असलेला आरोपी गजाआड आरोपी शांताराम याने घर पेटवून दिल्याने त्याचा मुलगा संस्कार हा सायंकाळी गावात आला. त्यानंतर त्याने ही माहिती गावकऱ्यांना दिली. त्यानंतर हा प्रकार उघडकीस आला. गावकऱ्यांनी दौंड पोलीस स्टेशनला याची माहिती दिली. त्यानंतर पोलिसांनी घटनास्थळी धाव घेत अनामिका हिचा जळालेल्या अवस्थेतील मृतदेह ताब्यात घेतला. त्यानंतर दौंड रुग्णालयात मृतदेह विच्छेदनासाठी पाठविण्यात आला. हा क्रूरपणे खून केल्यानंतर आरोपी शांताराम चव्हाण हा गावातील मद्याच्या नशेत फिरत होता. पोलिसांनी घटनास्थळी पंचनामा केला. त्यानंतर आरोपी शांताराम याला गावातच अटक केली आहे. त्याच्यावर दौंड पोलिसांत गुन्हा दाखल केला आहे. या घटनेमुळे बाप-लेकीच्या नात्याला काळीमा फासणारी ही घटना असून सर्वत्र परिसरात संताप व्यक्त केला जात आहे.