Amitabh Bachchan : बॉलिवूडच्या झगमगत्या दुनियेत सध्या ग्लॅमरपेक्षा सुरक्षेचीच अधिक चर्चा रंगताना दिसत आहे. एकीकडे कलाकारांच्या खासगी आयुष्यापासून त्यांच्या कामापर्यंत प्रत्येक गोष्टीवर चाहत्यांची नजर असते, तर दुसरीकडे सेलिब्रिटींना मिळणाऱ्या धमक्यांमुळे चिंता वाढली आहे.

अभिनेता टायगर श्रॉफच्या गाडीवर गोळीबार झाल्याच्या घटनेने मुंबईतील चित्रपटसृष्टीत खळबळ उडाली असतानाच आता बॉलिवूडचे महानायक अमिताभ बच्चन यांच्या मुंबईतील जुहू येथील ‘जलसा’ बंगल्याला बॉम्बने उडवण्याची धमकी मिळाल्याची धक्कादायक माहिती समोर आली आहे.

एवढंच नाही, तर प्रसिद्ध गायक आणि अभिनेता दिलजीत दोसांझ यांच्या आगामी कॉन्सर्टलाही आत्मघाती हल्ल्याची धमकी देण्यात आली आहे. मुंबईच्या महापौर कार्यालयासह काही शाळांनाही या धमकीच्या ईमेलमध्ये लक्ष्य करण्यात आल्याने पोलीस आणि सुरक्षा यंत्रणांची धावपळ उडाली.

या धमकीनंतर अमिताभ बच्चन यांच्या सुरक्षेत मोठी वाढ करण्यात आली आहे. विशेष म्हणजे, चाहत्यांना भेटण्याची अनेक दशकांची परंपरा कायम ठेवण्यासाठी बिग बी आता चक्क बुलेटप्रूफ काचेच्या संरक्षणातून चाहत्यांना अभिवादन करत आहेत. त्यांचा हा व्हिडिओ समोर आल्यानंतर चाहत्यांमध्येही चिंतेचं वातावरण निर्माण झालं आहे.

दिलजीत दोसांझच्या कॉन्सर्टलाही आत्मघाती हल्ल्याची धमकी!

या संपूर्ण प्रकरणात आणखी एक धक्कादायक बाब समोर आली आहे. प्रसिद्ध पंजाबी गायक आणि अभिनेता दिलजीत दोसांझ यांच्या मुंबईतील आगामी कॉन्सर्टलाही धमकी देण्यात आली आहे.

२७ नोव्हेंबर रोजी मुंबईतील महालक्ष्मी रेसकोर्स येथे दिलजीत यांचा कॉन्सर्ट आयोजित करण्यात येणार आहे. या कार्यक्रमात आत्मघाती हल्ला केला जाईल, असा इशारा धमकीच्या ईमेलमध्ये देण्यात आला होता. त्यामुळे या कार्यक्रमाच्या सुरक्षेचा प्रश्नही गंभीर बनला आहे.