Casino Baba | Manjunath Shetty : नाशिकमध्ये यापूर्वी समोर आलेल्या प्रकरणात अशोक खरात याच्यावर महिलांचे शोषण केल्याचे गंभीर आरोप झाले होते. स्वतःला आध्यात्मिक मार्गदर्शक किंवा ‘बाबा’ म्हणून सादर करून त्याने महिलांना विश्वासात घेतले आणि त्याचा गैरफायदा घेतल्याचे आरोप आहेत.

आध्यात्मिक उपचार, मार्गदर्शन आणि समस्यांचे समाधान या नावाखाली त्याने अनेक महिलांना मानसिकदृष्ट्या प्रभावित करून त्यांचे शोषण केले आहे.

मात्र, ही घटना चर्चेत असतानाच आणखी एक गंभीर प्रकार उघडकीस आला आहे. ज्यामुळे राज्यात मोठी खळबळ उडाली आहे. ठाण्यात ‘दिक्षित बाबा’ म्हणून ओळखल्या जाणाऱ्या ‘मंजूनाथ शेट्टी’ने काळी जादू आणि अघोरी पूजेच्या नावाखाली कोट्यवधी रुपयांची फसवणूक केल्याचा आरोप आहे.

ठाण्यातील प्रकरणात मंजूनाथ शेट्टी हा स्वतःला आध्यात्मिक ‘दिक्षित बाबा’ म्हणून सादर करत असे. तो प्रामुख्याने आर्थिकदृष्ट्या सक्षम आणि श्रीमंत लोकांना लक्ष्य करत असल्याची माहिती समोर आली आहे.

“तुमच्यावर काळी जादू झाली आहे”, “तुमच्या जीवाला धोका आहे” किंवा “विशेष पूजा केल्यास सर्व समस्या दूर होतील” अशा भीतीदायक आणि आकर्षक विधानांद्वारे तो लोकांचा विश्वास जिंकत असे. या भीतीच्या वातावरणाचा फायदा घेत तो लोकांकडून मोठ्या रकमा उकळत असल्याचा आरोप आहे.

तपासात समोर आलेल्या माहितीनुसार, तो अनेकदा पीडितांना गोव्याला घेऊन जात असे आणि तिथे अघोरी पूजा करण्याचे आमिष दाखवत असे. मात्र प्रत्यक्षात कोणतीही पूजा न करता तो गोव्यातील पंचतारांकित हॉटेल्स आणि कॅसिनोमध्ये मोठ्या प्रमाणावर पैसे खर्च करत असल्याचे उघड झाले आहे.

एका रात्रीत लाखो रुपयांचा खर्च केल्याच्या घटनाही समोर आल्या असून त्याच्या या आलिशान जीवनशैलीमुळे त्याला ‘कॅसिनो बाबा’ असेही नाव मिळाले आहे. या संपूर्ण प्रकरणात बँक व्यवहार, परदेशी संपर्क आणि काही स्थानिक कॅसिनो कर्मचाऱ्यांशी संबंध असल्याचा संशयही व्यक्त करण्यात आला आहे. सध्या या प्रकरणाचा ठाणे पोलीस सखोल तपास करत आहेत.