शिरूर :  शिरूर तालुक्यातील बेट भागातील सरदवाडी परिसरात अज्ञात चोरट्यांनी कुकडी नदीवरील शेतकऱ्यांच्या पाण्याच्या मोटारींना लक्ष्य केले. तब्बल सहा पाण्याच्या मोटारींची तोडफोड करून त्यातील ३३.५ किलो कॉपरच्या तारा चोरून नेल्याची घटना सोमवारी (ता. १०) उघडकीस आली. या चोरीत शेतकऱ्यांचे सुमारे ५० हजार रुपयांचे नुकसान झाले आहे.

याबाबत पोपट जबाजी सरोदे (वय ४५, रा. शरदवाडी, जांबूत) यांनी टाकळी हाजी दूरक्षेत्रात अज्ञात चोरट्याविरुद्ध फिर्याद दिली आहे. पोपट सरोदे यांच्या फिर्यादीनुसार, शरदवाडी परिसरातील शेतकरी कुकडी नदीवर पाण्याच्या मोटारी बसवून त्याद्वारे शेतातील पिकांना पाणी देतात. रविवारी (ता. ९) सायंकाळी पाचच्या सुमारास सरोदे यांनी आपली पाण्याची मोटार बंद करून घरी गेले होते. त्यावेळी परिसरातील इतर शेतकऱ्यांच्या मोटारीही सुरक्षित होत्या.

सोमवारी दुपारी तीनच्या सुमारास सरोदे मोटार सुरू करण्यासाठी नदीवर गेले असता त्यांच्या मोटारीच्या पाइपची तोडफोड झाल्याचे तसेच मोटारीचे नुकसान करून त्यातील कॉपरची तार काढून नेल्याचे निदर्शनास आले. त्यानंतर त्यांनी शेजारील शेतकऱ्यांना याबाबत माहिती दिली. पाहणी केली असता हनुमंत विठ्ठल जोरी, राजेंद्र देवराम गाडेकर, रानू रामभाव जोरी, ज्ञानदेव तुकाराम गांजे आणि राजेंद्र लक्ष्मण जोरी यांच्या पाण्याच्या मोटारींचीही तोडफोड झाल्याचे आढळून आले.

मोटारी फोडून कॉपरवर डल्ला

चोरट्यांनी मोटारींची तोडफोड करून त्यातील कॉपर काढून नेले आहे. यामध्ये पोपट सरोदे यांच्या १० एचपी टेक्समो मोटारीतील सहा किलो, हनुमंत जोरी यांच्या १० एचपी मोटारीतील सहा किलो, राजेंद्र गाडेकर यांच्या पाच एचपी मोटारीतील चार किलो, रानू जोरी यांच्या १० एचपी मोटारीतील सहा किलो, ज्ञानदेव गांजे यांच्या १० एचपी मोटारीतील सहा किलो, तर राजेंद्र लक्ष्मण जोरी यांच्या ७.५ एचपी मोटारीतील साडेपाच किलो कॉपरचा समावेश आहे. एकूण ३३.५ किलो कॉपर, अंदाजे ५० हजार रुपये किमतीचा ऐवज चोरीस गेल्याचे फिर्यादीत नमूद करण्यात आले आहे.

नदीकाठच्या शेतकऱ्यांमध्ये भीतीचे वातावरण

एकाच रात्री सहा शेतकऱ्यांच्या मोटारी फोडून कॉपर चोरीला गेल्याने परिसरातील शेतकऱ्यांमध्ये भीतीचे वातावरण निर्माण झाले आहे. चोरट्यांनी आधी मोटारींची तोडफोड करून त्यातील कॉपर काढले आणि त्यानंतर घटनास्थळावरून पोबारा केला. चोरीस गेलेल्या कॉपरचा परिसरात शोध घेण्यात आला; मात्र तो मिळून आला नाही. ९ ऑगस्ट रोजी सायंकाळी पाच ते १० ऑगस्ट रोजी दुपारी तीन या कालावधीत ही चोरी झाल्याचा अंदाज आहे. याप्रकरणी टाकळी हाजी दूरक्षेत्रात अज्ञात चोरट्याविरुद्ध फिर्याद दाखल करण्यात आली असून, पोलिसांकडून तपास सुरू आहे. कुकडी नदीकाठच्या भागात रात्रीची गस्त वाढवून चोरट्यांचा तातडीने बंदोबस्त करावा, अशी मागणी शेतकऱ्यांकडून होत आहे. सध्या शिरूर तालुक्यामध्ये चोरट्यांनी धुडगूस घातला असून विद्युत रोहित्र, विद्युत मोटारी चोरी,सोनसाखळी चोरी,घरफोडी यासारख्या घटनांमध्ये वाढ होताना दिसून येत आहे, यासाठी शिरूर पोलिसांनी वेळीच लक्ष घालून या चोरट्यांचा बंदोबस्त करणे गरजेचे आहे.