Abhijit Dipke : मतदार यादीच्या विशेष सखोल पुनरीक्षण प्रक्रियेला (SIR) विरोध, मतदारांची नावे कथितरीत्या वगळण्यात आल्याचा आरोप आणि मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आज, १० ऑक्टोबर रोजी दिल्लीत आंदोलनाचे आयोजन करण्यात आले आहे.

या आंदोलनाच्या पार्श्वभूमीवर कॅाकरोच जनता पार्टीचे (CJP) प्रमुख अभिजीत दिपके यांनी सोशल मीडियावर पोस्ट शेअर करत समर्थकांना महत्त्वाचा संदेश दिला आहे. राजधानी दिल्लीत मोठ्या संख्येने CJP चे प्रतिनिधी दाखल होणार असून, त्यांच्यासोबत अनेक तरुणही आंदोलनात सहभागी होणार आहेत. या आंदोलनामुळे दिल्लीतील राजकीय वातावरण तापण्याची चिन्हे दिसत आहेत.

अभिजीत दिपकेंची सोशल मीडियावर पोस्ट

आंदोलनासाठी दिल्लीकडे रवाना होताना अभिजीत दिपके यांनी सोशल मीडियावर एक पोस्ट शेअर केली. “जिंदगी जीने के दो ही तरीके होते है… एक जो हो रहा है, होने दो, बर्दाश्त करते जाओ… या फिर जिम्मेदारी उठाओ उसे बदलने की,” असा संदेश त्यांनी दिला आहे. या विधानातून अन्याय किंवा परिस्थिती केवळ सहन करत राहण्याऐवजी ती बदलण्यासाठी पुढाकार घेण्याची भूमिका त्यांनी मांडली आहे.

आंदोलनासाठी तुरुंगात जाण्याचीही तयारी

जंतर-मंतर येथे आंदोलन करण्यावर आपण ठाम असल्याचे अभिजीत दिपके यांनी स्पष्ट केले आहे. आंदोलनासाठी तुरुंगात जाण्याचीही तयारी असल्याचे त्यांनी म्हटले आहे. त्यामुळे CJP च्या या आंदोलनाकडे अवघ्या देशाचे लक्ष लागले आहे.

या आंदोलनाच्या पार्श्वभूमीवर दिल्ली पोलिसांनी सुरक्षेची व्यापक व्यवस्था केली आहे. जंतर-मंतर परिसरात बॅरिकेडिंग करण्यात आले असून, संसद मार्ग, जनपथ, कॅनॉट प्लेस आणि जंतर-मंतरकडे जाणाऱ्या रस्त्यांवर पोलिसांचा बंदोबस्त वाढवण्यात आल्याची माहिती आहे.

मेट्रो आणि रेल्वे वाहतुकीवरही परिणाम?

आंदोलनाच्या पार्श्वभूमीवर दिल्लीतील ४५ मेट्रो स्थानकांवरील प्रवेश आणि बाहेर पडण्याचे मार्ग बंद करण्यात आल्याची माहिती आहे. तसेच नवी दिल्ली आणि हजरत निजामुद्दीन रेल्वे स्थानकांकडे येणाऱ्या किंवा तेथून सुटणाऱ्या काही विशेष आणि मेल गाड्या रद्द करण्यात आल्याचेही सांगितले जात आहे.

जंतर-मंतरवरील आंदोलनाला पोलिसांची परवानगी नाकारली

CJP ने जंतर-मंतर येथे आंदोलन करण्यासाठी दिल्ली पोलिसांकडे परवानगी मागितली होती. मात्र, पोलिसांनी ही परवानगी नाकारली. CJP ने ७ ऑक्टोबर रोजी आंदोलनासाठी अर्ज केल्याने परवानगी नाकारण्यात आली.

आंदोलनासाठी साधारण दहा दिवस आधी अर्ज करणे आवश्यक असल्याचे कारण दिल्ली पोलिसांकडून दिले जात असल्याची माहिती सूत्रांकडून मिळत आहे. त्यामुळे परवानगी नाकारल्यानंतरही CJP आंदोलनाच्या भूमिकेवर ठाम असून दिल्लीत नेमकं काय काय घडणार याकडेच सर्वांचे लक्ष लागले आहे.

Satara: दुर्गोत्सवाच्या स्वागतासाठी सातारा सज्ज, बाजारपेठेत गर्दी; मूर्तीकारांची लगबग; मंडप, मंदिरांच्या सजावटीला वेग