Nitesh Rane : हिंदी चित्रपटसृष्टीतील ज्येष्ठ अभिनेते नसीरुद्दीन शाह यांनी केलेल्या एका वक्तव्यामुळे मोठा वाद निर्माण झाला आहे. त्यांच्या वक्तव्यावर केंद्रीय मंत्री आणि भाजप नेते किरण रिजिजू यांनी प्रतिक्रिया दिली होती. अशातच आता मंत्री नितेश राणे यांनी यावर तीव्र संताप व्यक्त करत शाह यांना थेट पाकिस्तानात जाण्याचा सल्ला दिला आहे.

“जर नसीरुद्दीन शाह यांना आपल्या हिंदू राष्ट्राचा इतका राग असेल आणि स्वतःला दिमागी नक्षल म्हणवून घ्यायचं असेल, तर त्यांनी पाकिस्तानात निघून जावं.” असे नितेश राणे म्हणाले आहेत. नितेश राणे म्हणाले, “पाहा, नसीरुद्दीन शाह यांच्यासारखे लोक कमाई तर आपल्या हिंदू राष्ट्रात करतात, पण मीठ पाकिस्तानचं खातात. पाकिस्तानात बसलेले त्यांचे जे अब्बा आहेत, ते अशा जिहादी आणि दिमागी नक्षलवाद्यांना स्क्रिप्ट देतात. नसीरुद्दीन शाह यांचा जन्म आणि संगोपन आपल्या हिंदू राष्ट्रात झालं आहे. त्यांचे चित्रपट इथे प्रदर्शित होतात, पाकिस्तानमध्ये नाहीत. ज्या देशात ते कमावतात, त्याच हिंदू राष्ट्रात बसून ते अशा प्रकारची वक्तव्यं करत आहेत. जर नसीरुद्दीन शाह यांना आपल्या हिंदू राष्ट्राचा इतका राग असेल आणि स्वतःला दिमागी नक्षल म्हणवून घ्यायचं असेल, तर त्यांनी पाकिस्तानात निघून जावं.”

नसीरुद्दीन शाह हे हिंदी चित्रपटसृष्टीतील प्रदीर्घ अनुभव असलेले अभिनेते आहेत. त्यांच्या चित्रपटांनी प्रेक्षकांवर एक वेगळी छाप पाडली आहे. आपल्या दमदार अभिनयासोबतच ते नेहमी सामाजिक आणि राजकीय विषयांवर आपले मत व्यक्त करतात. अनेकदा त्यांची वक्तव्य आणि त्यांनी घेतलेली भूमिका वादाच्या भोवऱ्यात सापडते. आताही त्यांनी व्यक्त केलेले मत वादाच्या भोवऱ्यात सापडले आहे.

नसरुद्दीन शाह नेमकं काय म्हणाले?

नसरुद्दीन शाह यांनी त्यांच्या सोशल मीडिया अकाऊंटवरुन एक व्हिडिओ शेअर केला आहे. त्यांनी जामिया मिलिया इस्लामिया विद्यापीठातील विद्यार्थ्यांच्या आंदोलनाला पाठिंबा दिला होता. तसेच विद्यार्थ्यांच्या प्रश्नांवर आणि देशातील शिक्षणव्यवस्थेवरून केंद्र सरकारवर टीका केली होती. व्हिडिओत ते म्हणाले की “मी अभिमानाने सांगतो, मी दिमागी नक्षल आहे. मला टुकडे-टुकडे गँग म्हणा की काहीही म्हणा असे म्हणत त्यांनी केंद्र सरकारवर टीका केली.

लोकशाहीसाठी अत्यंत घातक आणि नुकसानदायक

केंद्रीय मंत्री किरण रिजिजू यांनी नसरुद्दीन शाह यांच्या वक्तव्यावर मत व्यक्त करताना म्हटले की, ते नसीरुद्दीन शाह यांना केवळ एक सामान्य कलाकार समजायचे आणि त्यांचा आदर करायचे. परंतु, ते इतके खतरनाक ‘अर्बन दिमागी नक्षल’ निघतील, याची त्यांना कल्पना नव्हती. त्यांना शाह यांच्या खऱ्या व्यक्तिमत्त्वाचा आणि चारित्र्याचा उशिरा उलगडा झाला. शाह यांचे विचार आणि त्यांची भूमिका भारतीय लोकशाहीसाठी अत्यंत घातक आणि नुकसानदायक असल्याचे मत किरण रिजिजू यांनी व्यक्त केले.

Satara: सुरक्षा ठेवींसाठी मक्तेदार संघटना आक्रमक