पुणे – शिक्षण, महसुल विभागात नोकरी लावण्याचे आमिषाने 44 जणांची तब्बल 5 कोटींची फसवणुक केल्याप्रकरणी महाराष्ट्र राज्य परीक्षा परिषदेचे तत्कालीन आयुक्त शैलजा रामचंद्र दराडे यांचा जामीन अर्ज लष्कर येथील प्रथमवर्ग न्यायदंडाधिकारी डी. जे. पाटील यांनी फेटाळला. या प्रकरणात फेब्रुवारी महिन्यात शैलजा दराडे ( रा.पाषाण) यांच्यासह त्यांचा भाऊ दादासाहेब रामचंद्र दराडे ( रा. इंदापूर) याच्याविरुद्ध हडपसर पोलिसात गुन्हा दाखल केला आहे. याबाबत पोपट सुखदेव सूर्यवंशी ( रा. खाणजोडवाडी, ता. आटपाडी, जि. सांगली) यांनी फिर्याद दिली होती. त्यानंतर 7 ऑगस्ट रोजी पोलिसांनी शैलजा दराडे यांना अटक केली होती. न्यायालयाने सुरूवातील दराडे यांना पोलीस कोठडी, त्यानंतर न्यायालयीन कोठडी सुनवली. त्यानंतर त्यांनी जामिनासाठी अर्ज केला होता. यास सरकारी वकील अंजला नवगिरे यांनी विरोध केला. हा गुन्हा गंभीर स्वरुपाचा असून, याप्रकरणाचा तपास सुरू आहे. दराडे यांना जामीन मंजूर झाल्यास तपासास बाधा येईल. त्यामुळे त्यांचा जामीन मंजूर करण्यात येऊ नये, असा युक्तीवाद त्यांनी केला. त्यानुसार न्यायालयाने हा आदेश दिला. फिर्यादी सुर्यवंशी शिक्षक असून त्यांच्या नात्यातील महिलेला शिक्षक पदावर नोकरी मिळवायची होती. त्यासाठी ते विविध ठिकाणी माहिती घेत असताना जून 2019 मध्ये सुर्यवंशी यांची भेट आरोपी दादासाहेब दराडे याच्याशी झाली. त्याने बहिण शैलजा दराडे शिक्षण विभागात अधिकारी असल्याचे सांगितले. त्यानुसार मी तुमच्या दोन नातेवाईक महिलांना शिक्षक पदावर नोकरी लावतो, असे सांगितले. आरोपी दादासाहेब याने हडपसरमध्ये 27 लाख रुपये घेतले. काही महिने उलटल्यानंतरही नातेवाईक महिलांना नोकरी न लावल्याने सूर्यवंशी यांनी पैसे मागितले. मात्र, त्याने पैसे परत न देता फसवणूक केल्याचे उघड झाले
