दुबई – अमेरिकेबरोबरचा तणाव कमी करण्याच्या हेतूने होणारी चर्चा निष्पक्ष आणि न्याय्य असावी, असे निर्देश इराणचे अध्यक्ष महसूद पेझेश्कीयान यांनी परराष्ट्र मंत्रालयाला दिले आहेत. हिंसक आंदोलनामुळे अमेरिकेबरोबर वाढलेला तणाव कमी करण्यासाठी अमेरिकेबरोबर चर्चा व्हावी,यासाठी इराणकडून प्रथमच स्पष्ट संकेत दिले गेले आहेत. इराणचे अध्यक्ष मसूद पेझेश्कीयान हे सुधारणावादी नेते म्हणून ओळखले जातात. देशातील परिस्थिती आता आपल्या नियंत्रणाबाहेर जात असल्याचे त्यांनी म्हटले होते. त्यासाठी अमेरिकेबरोबर चर्चेद्वारे तोडगा काढण्याचा त्यांनी निर्णय घेतला आहे. त्यांच्या या निर्णयाला इराणचे सर्वोच्च नेते आयातुल्ला अली खामेनी यांनी देखील पाठिंबा दिला असल्याचे संकेत मिळत आहेत. खामेनी यांनी पुर्वी अमेरिकेबरोबर कोणत्याही चर्चेला नकाराची भूमिका घेतली होती. दोन्ही देशांमध्ये चर्चा घडवून आणण्यासाठी तुर्कीयेकडून पडद्यामागून हालचाली केल्या जात होत्या. ही चर्चा या आठवड्याच्या अखेरीस तुर्कीयेत व्हावी, असे प्रयत्न आहेत. मात्र या चर्चेदरम्यान इराणच्या आण्विक कार्यक्रमाबाबतही चर्चा व्हावी, असे ट्रम्प यांनी म्हटल्यामुळे दोन्ही देशात मतैक्य होईल का याबाबत अजूनही संदिग्धता आहे. मित्र देशांनी विनंती केल्यामुळे चर्चेबाबतचा निर्णय घेण्यात आल्याचे पेझेश्कीयान यांनी सोशल मीडियावरच्या पोस्टमध्ये म्हटले आहे. चर्चेला पोषक वातावरण असावे, धमक्या आणि अवास्तव मागण्या केल्या जाऊ नयेत. चर्चा सन्मान, विवेक आणि व्यवहार्यतेची तत्त्वांना अनुसरून असायला हवी, असे पेझेश्कीयान यांनी परराष्ट्र मंत्री अब्बास अराघची यांना दिलेल्या निर्देशांमध्ये म्हटले आहे. अमेरिका-इराणदरम्यानच्या चर्चेची पुर्वतयारी म्हणून अमेरिकेचे मध्यपूर्वेसाठीचे विशेष दूत स्टीव्ह विटकॉफ मध्यपूर्वेचा दौरा करणार आहेत. ते इस्रायलमध्ये पंतप्रधान बेंजामिन नेतान्याहू यांची भेट घेणार आहेत.
