झ्युरिच : जगभरात कोरोना व्हायरसचा कहर सुरुच आहे. त्यातच एक दिलासादायक बातमी समोर येत आहे.  स्वित्झर्लंडची फार्मस्युटिकल कंपनी रॉशला अँटीबॉडी चाचणी करण्यासाठी अमेरिकेच्या अन्न व औषध प्रशासनाकडून मंजुरी मिळाली आहे. चाचणीचे उत्पादन वर्षअखेरपर्यंत दुप्पट करण्याचा कंपनीचा उद्देश असल्याचे  रॉशचे डायग्नोस्टिक्स प्रमुख थॉमस शिनेकर यांनी सांगितले. प्रतिमहिना पाच कोटीवरुन 10 कोटी चाचणीचे उत्पादन करणार असल्याचे  त्यांनी सांगितले.

कोरोनाची लागण झालेल्यांसह, ज्यांना कोरोनाची लागण झाली आहे, परंतु लक्षणं दिसलेली नाहीत, अशा रुग्णांबाबतही माहिती मिळणारी अँटीबॉडी चाचणी विकसित केल्याचा दावा रॉश कंपनीने काही दिवसांपूर्वीच केला होता.

जगभरात कोरोना व्हायरसचा कहर सुरुच आहे. जगात कोरोना व्हायरसचा संसर्ग झालेल्यांची संख्या 35 लाख 65 हजार 310 वर पोहोचली आहे. तर आतापर्यंत मृत्यूंची संख्या जगभरात 2 लाख 48 हजार 565 वर पोहोचली आहे. तसेच या व्हायरसपासून जगभरात 11 लाख 54 हजार रुग्ण बरे झाले आहेत. कोरोना व्हायरसमुळे विविध देशांमध्ये लॉकडाऊन आहे. परिणामी अर्थव्यवस्था पुरती कोलमडली आहे. त्यामुळे कोरोनावर लवकराच लवकर लस शोधून तसेच टेस्टिंगचे वाढवून रुग्णांना शोधून त्यांच्यावर उपचार व्हावे यासाठी प्रयत्न सुरु आहेत.

कोणाला हा आजार झाला आहे, कोणाची रोगप्रतिकारशक्ती कमी असू शकते हे जाणून घेण्यासाठी सरकार, व्यवसायिक आणि प्रत्येक व्यक्ती अशा चाचणीच्या शोधत आहेत, जेणेकरुन लॉकडाऊन संपवण्यासाठी काही उपाययोजना केल्या जातील, रणनीती आखली जाईल.