कोयनानगर : राज्य उत्पादन शुल्क या तोलामोलाच्या खात्याचा लौकिक वाढवल्यानंतर ना. शंभूराज देसाई यांच्याकडे पर्यटनसारख्या महत्वाच्या खात्याची जबाबदारी महायुती सरकारमध्ये देण्यात आली आहे. आपल्याला देण्यात आलेले हे खाते सुध्दा तोलामोलाचे असून अडीच वर्षात उत्पादन शुल्क विभाग खात्याच्या माध्यमातून विक्रमी महसूल गोळा करुन शासनाच्या तिजोरीत महसूल गोळा करुन उत्पादन शुल्क विभागाचा लौकिक वाढवण्याचे काम केले त्याच पद्धतीने पर्यटन या तोलामोलाच्या खात्याचा लौकिक वाढवून पर्यटनाच्या माध्यमातून राज्यात इकॉनॉमी तयार करुन अर्थव्यवस्थेला गती देण्याचे काम करणार आहे.

सातारा, सांगली, कोल्हापूर, कोकणासह राज्यातील अनेक पर्यटनस्थळे विकसित करणार असल्याची प्रतिक्रिया नूतन पर्यटनमंत्री शंभूराज देसाई यांनी दिली.ना. शंभूराज देसाई यांच्याकडे असलेले वजनदार उत्पादन शुल्क खात्यावरुन महायुती सरकारमध्ये पर्यटन खात्याची जबाबदारी शंभूराज देसाई यांच्याकडे देण्यात आली आहे. याबाबत ना.शंभूराज देसाई म्हणाले की कोणतेही खाते छोटे अथवा मोठे नसते.

पर्यटन खातेसुध्दा तोलामोलाचे आहे. राज्यात पर्यटनाला खूप क्षमता आहे. पर्यटन विकासासाठी मोठी संधी आहे. कोल्हापूर, कोकण ,सातारा यांसह राज्यात अनेक पर्यटनस्थळे आहेत. नवनवीन संकल्पना राबवून ही पर्यटनस्थळे विकसित करण्यावर आपला भर असणार आहे. लोकांचा कल निसर्गाकडे चला असा असून पर्यटनाला चांगले दिवस आले आहेत.

राज्यात पर्यटनाच्या माध्यमातून मोठ्या प्रमाणात इकॉनॉमी तयार होत आहे. यामुळे अर्थव्यवस्थेला गती मिळत आहे. उपमुख्यमंत्री एकनाथ शिंदे यांनी पर्यटन विभागाला चांगला निधी देऊ असे आश्वस्त केले असल्याने पर्यटन विभागात सुध्दा चांगलेच काम होईल असा विश्वास त्यांनी यावेळी व्यक्त केला.