पुणे: पुण्यात स्थायिक झालेल्या सादडी (राजस्थान) समुदायाच्या वतीने आयोजित करण्यात आलेला ‘वार्षिक सादडी क्रीडा महोत्सव २०२६’ नुकताच डाऊनटाऊन, गंगाधाम येथे मोठ्या उत्साहात पार पडला. गेल्या ३० वर्षांची परंपरा असलेल्या या महोत्सवात यंदा पुणे आणि पिंपरी-चिंचवड परिसरातील सुमारे १५०० नागरिक सहभागी झाले होते. पिढ्यानपिढ्यांचा उत्साह आणि सामाजिक एकोपा – राजस्थानातील पाली जिल्ह्यातील प्रसिद्ध राणकपूर जैन मंदिराचे गाव असलेल्या सादडीतून सुमारे दीडशे वर्षांपूर्वी ५०० कुटुंबे पुण्यात स्थलांतरित झाली. आज ही कुटुंबे पूर्णपणे पुणेकर झाली असली, तरी त्यांनी आपली सांस्कृतिक मुळे आणि सामाजिक सलोखा जपला आहे. हा क्रीडा महोत्सव याच एकोप्याचे प्रतीक मानला जातो. यंदा ४, १० आणि ११ जानेवारी रोजी पार पडलेल्या या स्पर्धेत ३ वर्षांच्या बालकांपासून ७० वर्षांच्या ज्येष्ठांपर्यंत सर्व वयोगटांतील स्त्री-पुरुषांनी आपला क्रीडा उत्साह दाखवला. विविध खेळांची मेजवानी क्रीडा कौशल्याला चालना देण्यासाठी आयोजित या महोत्सवात ९५० हून अधिक स्पर्धांच्या नोंदी झाल्या. यामध्ये खालील खेळांचा समावेश होता: मैदानी खेळ: क्रिकेट, फुटबॉल, लिंगोरचा आणि धावण्याच्या (ट्रॅक) स्पर्धा. इनडोअर आणि इतर: बॅडमिंटन, ज्येष्ठ नागरिकांसाठी कॅरम आणि फ्रिस्बी. विजेत्यांना ‘हाऊस ट्रॉफी’ने गौरविले स्पर्धेचे नियोजन अधिक चुरशीचे करण्यासाठी सर्व खेळाडूंना चार वेगवेगळ्या ‘हाऊसेस’मध्ये विभागण्यात आले होते. विविध खेळांमध्ये सर्वांत जास्त गुण मिळवून आपले वर्चस्व सिद्ध करणाऱ्या विजयी हाऊसला मानाची ‘हाऊस ट्रॉफी’ देऊन सन्मानित करण्यात आले. “आरोग्यदायी जीवनशैली, संघभावना आणि विशेषतः नवीन पिढीला एकत्र आणून त्यांच्यात सामाजिक सलोखा वृद्धिंगत करणे हा या महोत्सवाचा मुख्य उद्देश आहे,” असे आयोजकांच्या वतीने सांगण्यात आले. गेल्या तीन दशकांपासून अविरत सुरू असलेला हा उपक्रम केवळ खेळ म्हणूनच नव्हे, तर सादडी समुदायाचा स्नेहमेळावा म्हणूनही ओळखला जातो. संपूर्ण महोत्सवादरम्यान खेळाडूंच्या उर्जेमुळे गंगाधाम परिसर चैतन्यमय झाला होता.
