हिंगोली – मराठवाड्यात स्वतःची इमारत नसलेल्या ३४३९‎ अंगणवाडी बांधकामासाठी छत्रपती‎ संभाजीनगर येथे झालेल्या मंत्रिमंडळ बैठकीत‎ ३८६.८८ कोटी रुपयांच्या निधीची घोषणा करण्यात आली होती. मात्र त्यानंतर आता हा ‎निधी जिल्हा नियोजनासह इतर योजनेतून ‎उपलब्ध करून घेण्याच्या सूचना महिला बालविकास विभागाने दिल्या आहेत. ‎त्यामुळे अंगणवाड्यांचे बांधकाम कसे पूर्ण‎ करावे, हा प्रश्‍न स्थानिक प्रशासनासमोर उभा ‎राहणार आहे.‎

मराठवाड्यातील आठही जिल्ह्यांत एकूण‎ १८९७७ अंगणवाड्या आहेत. या‎ अंगणवाड्यांतून सुमारे ५ लाखांपेक्षा अधिक‎ बालके येतात. या बालकांना अंगणवाडीतून ‎पोषण आहार दिला जातो. याशिवाय प्राथमिक‎ स्तरावरील आकार हा अभ्यासक्रम देखील ‎शिकवला जातो. मात्र यापैकी ४७२४ ‎अंगणवाड्यांना स्वतःची इमारत नाही. त्यामुळे‎ या अंगणवाड्या भाड्याच्‍या इमारतीमध्ये ‎चालतात. त्यातून अपुऱ्या जागेमुळे बालकांच्या ‎जागेचा प्रश्‍नही निर्माण होत आहे.‎

मराठवाड्यात स्वतःची इमारत नसलेल्या ‎४७२४ पैकी जागेच्या उपलब्धतेनुसार ३४३९ ‎अंंगणवाड्यांचे बांधकाम करण्याचा निर्णय ‎घेण्यात आला आहे. त्यानुसार छत्रपती‎ संभाजीनगर येथे १६ सप्टेंबर रोजी झालेल्या ‎मंत्रिमंडळाच्या बैठकीत या अंगणवाड्यांसाठी‎ तीन वर्षांचा कालबद्ध कार्यक्रम आखून ‎त्यानुसार ३८६.८८ कोटी रुपयांचा निधी मंजूर‎ करण्याची घोषणा करण्यात आली होती.‎ त्यामुळे या अंगणवाड्यांना तीन वर्षांत का‎ होईना हक्काची इमारत मिळणार असल्याने ‎स्थानिक प्रशासनासोबच पालकांनीही सुटकेचा‎ निःश्‍वास सोडला होता.‎

त्यानंतर शासनाच्या महिला बालकल्याण‎विभागाने पत्र पाठवले आहे. त्यामध्ये‎ अंगणवाडी बांधकामासाठी तीन वर्षांचा‎ कालबद्ध कार्यक्रम हाती घेऊन जागा उपलब्ध‎ असलेल्या ठिकाणी बांधकाम सुरू करण्याच्या‎ सूचना दिल्या आहेत. त्यासाठी जिल्हा नियोजन‎समिती, मानव विकास मिशन, स्थानिक‎आमदार विकास निधीतून बांधकामासाठी निधी ‎उपलब्ध करण्याच्या सूचनाही दिल्या आहेत.‎

जिल्हा नियोजन समिती व मानव विकास‎ मिशनमध्ये महिला-बाल कल्याणसाठी काही ‎निधी राखीव असला तरी तो अपुरा आहे.‎ शासनाने स्वतंत्रपणे निधी उपलब्ध करून देणे‎ अपेक्षित असताना स्थानिक पातळीवरूनच ‎निधी उपलब्ध करून घेण्याच्या सूचना देण्यात‎ आल्यामुळे तीन वर्षांत ही कामे पूर्ण करणे‎ स्थानिक प्रशासनासमोर मोठे आव्हान आहे.‎

अंगणवाड्या अन्‎त्यासाठी लागणारा निधी‎
छत्रपती संभाजीनगरः‎ ६०० (निधी ६७.५० कोटी)
जालनाः १६६ ‎(१८.६७ कोटी)
परभणीः १९६ (२२.०५ कोटी)
हिंगोलीः २७‎ (३ कोटी)
नांदेडः‎ १२२४ (१२७.४६‎ कोटी)
लातूरः १५ (१.७० कोटी)
धाराशिवः ७८ (८.७७ कोटी)