पुणे – “करोना’चा प्रादुर्भाव रोखण्यासाठी अखेर महाराष्ट्र लोकसेवा आयोगाने (एमपीएससी) राज्यसेवा पूर्व परीक्षा आणि महाराष्ट्र दुय्यम सेवा अराजपत्रीत गट ब संयुक्त पूर्व परीक्षा पुढे ढकलण्याचा निर्णय घेतला आहे. ही परीक्षा आता 26 एप्रिल आणि 10 मे रोजी होणार आहेत.

“करोना’चा विषाणू वाढत असल्याने राज्य सरकारने शाळा, महाविद्यालयांसह खासगी क्‍लासेस बंद केले. तसेच हॉटेल व खानावळी बंद झाल्याने जेवणाची सोय होत नव्हती. त्यामुळे “एमपीएससी’चा अभ्यास करणारे विद्यार्थी गावाकडे गेले. सरकार इतर परीक्षा रद्द करत असताना पाच एप्रिल रोजी होणारी राज्यसेवा पूर्व परीक्षाही रद्द करून पुढे ढकलावी अशी मागणी विद्यार्थ्यांनी लावून धरली होती. मात्र, त्यावर “एमपीएससी’कडून निर्णय होत नव्हता.

राज्यातील रुग्णांची संख्या वाढल्याने व राज्यात 144 कलम लावल्यानंतर मात्र, “एमपीएससी’ने परीक्षांच्या तारखेत बदल केला. राज्यसेवा पूर्व परीक्षा आता पाच एप्रिल ऐवजी 26 एप्रिल 2020 तर महाराष्ट्र दुय्यम सेवा अराजपत्रीत गट ब संयुक्त पूर्व परीक्षा 3 मे ऐवजी 10 मे 2020 रोजी होणार आहे, असे “एमपीएससी’तर्फे कळविण्यात आले आहे.