सातारा – गोडोली येथील पशुसंवर्धन विभागाची सुमारे 15 एकर जागा आयटी पार्कसाठी उपलब्ध करून द्यावी. तसेच ही जागा या प्रस्तावाच्या प्रक्रियेसाठी उद्योग मंत्रालयाकडे हस्तांतरित करावी, अशी मागणी खासदार उदयनराजे भोसले यांनी मुख्यमंत्री एकनाथ शिंदे यांच्याकडे केली आहे

यासंदर्भात सविस्तर माहिती पत्रकात नमूद आहे की शहरात अनेक वर्षांपासूनची आयटी पार्कची जिल्ह्याची मागणी आहे. यासाठी जागेचा प्रश्‍न मोठा आहे. सातारा एमआयडीसीमध्ये आयटी पार्कसाठी जागा अपुरी आहे. तसेच एखाद्या कंपनीला खासगी जागेत आयटी पार्क उभारणे आर्थिक दृष्ट्या परवडणारे नाही. जिल्ह्यातील हजारो तरुण- तरुणी आयटी कंपन्यांमध्ये मोठ्या अधिकारी पदावर कार्यरत आहेत. मात्र, त्यांच्या कुशल बुद्धिमत्तेचा उपयोग जिल्ह्यासाठी होत नाही.

अशी आयटी पार्क जिल्ह्याच्या बाहेर आहेत. सातारा शहरात अद्ययावत आयटी पार्क उभे राहवे ही साताऱ्याच्या उद्योग विश्‍वाच्या दृष्टीने काळाची गरज आहे. त्यासाठी इनोव्हेटिव्ह सातारा’ संकल्पना मांडली आहे. त्या अंर्तगत गोडोली येथील 49 ब, 49 अ व 50 अ अशी 15 एकर जागा पशुसंवर्धन विभागाची (ऍनिमल हजबंडरी) आहे. ही जागा पोल्ट्री फार्मसाठी आरक्षित होती. मात्र, सध्या येथे हा प्रकल्प कार्यरत नाही.

त्यामुळे पशुसंवर्धन विभागाची ही जागा आयटी पार्कसाठी हस्तांतरित करण्यात यावी. शहराच्या आसपास सुमारे 15 पेक्षा जास्त इंजिनिअरिंग कॉलेजेस विद्यार्थी घडवण्याचे काम करत आहेत. साताऱ्यात माहिती तंत्रज्ञान क्षेत्राचे ज्ञान घेणारे हजारो विद्यार्थी आहेत. कोविडनंतर पायाभूत सुविधांचा खर्च कमी करत अनेक कंपन्या सातारा, सांगली, कोल्हापूर यासारख्या छोट्या शहरांमध्ये सॅटॅलाइट (उपकंपनी) ऑफिस सुरू करण्यासाठी इच्छुक आहेत. आयटी कंपन्यासुद्धा छोट्या पातळीवर गुंतवणूक करण्यासाठी पुढे येत आहेत.

पशुसंवर्धन विभागाची ही जागा असून राष्ट्रीय महामार्गापासून 200 मीटर अंतरावर आहे. यामुळे येथे दळणवळण करणे अतिशय सुलभ होणार आहे. आयटी कंपन्यांच्या दृष्टिकोनातून विशेष आयटी झोनसाठी येथील जागेला मान्यता दिल्यास साताऱ्यासारख्या छोट्या शहराला जागतिक पातळीवर स्थान मिळणार आहे. रोजगारासाठी बंगळुरू, पुणे- मुंबईला जाणारा तरुण बाहेर न जाता येथेच त्याला रोजगार उपलब्ध होणार आहे. ही जागा नागरी वस्तीमध्ये आहे. येथे आयटी कंपनी आल्यामुळे नागरिकांचे जीवनमान उंचावणार असून आयटी पार्कचे कोणतेही दुष्परिणाम होणार नाहीत.

औद्योगिक कंपन्यांसारखी पर्यावरण प्रदूषण यासारख्या परवानगीची येथे आवश्‍यकता नाही. मगरपट्टा सिटी हडपसर, कल्याणीनगर मुंढवा, हिंजवडी येथील आयटी कंपन्या पुणे मुंबई महामार्गालगत नागरी वस्तीमध्येच आहेत. ही जागा पशुसंवर्धन विभागाकडून तात्काळ उद्योग मंत्रालयाकडे हस्तांतरित व्हावी, यासाठी मुख्यमंत्र्यांकडे तातडीने बैठक घ्यावी व या जागेचा वस्तुस्थितीपूर्ण अहवाल त्यांनी जिल्हाधिकाऱ्यांकडून मागवून घ्यावा, अशी मागणी उदयनराजे यांनी पत्रकाद्वारे मुख्यमंत्र्यांकडे केली आहे.