मुंबई :  जगभरात कोरोनाचे 54 लाखांहून अधिक रुग्ण झाले आहेत. मागील 24 तासात जगातील 213 देशांमध्ये 97897 नवीन कोरोना रुग्ण समोर आले आहेत. वर्ल्डोमीटरच्या आकडेवारीनुसार  कोरोनाची लागण 5,401,612 लोकांना झाली असून आतापर्यंत मृत्यूंची संख्या 343,804 वर पोहोचली आहे. दिलासादायक बाब म्हणजे जगभरात 2,247,151 रुग्ण बरे झाले आहेत. जगातील 75 टक्के कोरोनाबाधित हे केवळ बारा देशांमध्येच आहेत. या बारा देशांमध्ये कोरोनाबाधितांचा आकडा 41 लाखांच्या घरात आहे.

वर्ल्डोमीटरच्या आकडेवारीनुसार रुग्णांच्या संख्येच्या बाबतीत भारत जगात अकराव्या स्थानावर आहे. भारतात कोविडचे 131,423 रुग्ण आहेत. तर 3,868 बळी कोरोनामुळे गेले आहेत. सध्या भारतात 73,170  अॅक्टिव्ह केसेस असून आतापर्यंत 54,385 जणांना डिस्चार्ज मिळाला आहे.

जगात कोरोनाचा सर्वाधिक फटका अमेरिकेला बसला आहे. जगात जवळपास एक तृतीयांश कोरोना केसेस तर एक तृतीयांश मृत्यू एकट्या अमेरिकेत झाले आहेत. अमेरिकेत 1,666,828 जणांना कोरोनाचा संसर्ग झाला आहे . तर 98,683 लोकांचा मृत्यू कोरोनामुळे  झाला आहे. अमेरिकेनंतर यूकेमध्ये सर्वाधिक मृत्यू झाले आहेत. यूकेत 36,675 लोकांचा कोरोनामुळे  मृत्यू झाला आहे. तर तिथं कोरोनाबाधितांची संख्या 257,154  इतकी आहे.