पुसेसावळी, (प्रतिनिधी) – कराड उत्तर विधानसभा मतदारसंघातील पाणीप्रश्नासह सर्व महत्त्वाचे प्रश्न लवकरच मार्गी लागणार आहे. त्यासाठी धैर्यशील कदम प्रयत्नशील असून, उपमुख्यमंत्री देवेंद्र फडणवीस यांच्या उपस्थितीत लवकरच बैठक होणार आहे.

विकासकामे व पाणीप्रश्नाची अजिबात काळजी करू नये. आगामी विधानसभा निवडणुकीत कराड उत्तरचा आमदार भाजपचाच असेल. त्यासाठी सर्वांनी कामाला लागावे, असे आवाहन आ. जयकुमार गोरे यांनी केले.

वर्धन अ‍ॅग्रो प्रोसेसिंग लिमिटेडचे कार्यकारी संचालक विक्रमशील कदम यांच्या वाढदिवसानिमित्त पुसेसावळी, ता. खटाव येथे झालेल्या स्नेहमेळाव्यात ते बोलत होते. भाजप जिल्हाध्यक्ष धैर्यशील कदम, जिल्हा परिषदेच्या माजी सदस्या सुनीता कदम,

गीतांजली कदम, तेजस्विनी कदम, राजवर्धन कदम, संपतराव माने, सुरेश पाटील, महेश जाधव, सत्वशील कदम, शंकर शेजवळ, महेश पाटील, महेश घार्गे, श्रीकांत पिसाळ, दत्तात्रय थोरात, धनाजी माने, तुषार माने, अमोल कदम, ज्ञानेश्वर पवार, दिलीप यादव, अमित जाधव व नागरिक मोठ्या संख्येने उपस्थित होते.

आ. गोरे म्हणाले, धैर्यशील कदम यांच्या मार्गदर्शनाखाली विक्रमशील कदम यांचे सामाजिक, राजकीय व औद्योगिक श्रेत्रातील कार्य कौतुकास्पद आहे. कदम कुटुंबीयांनी समाजसेवेचा वसा अखंड ठेवावा. शामगाव, हणबरवाडी पाणी योजना व अन्य विकासकामांची फाइल अंतिम टप्प्यात असून, त्यास लवकरच मंजुरी मिळेल.

धैर्यशील कदम म्हणाले, विक्रमशील कदम यांचा वाढदिवस, हे निमित्त असून, त्यामुळे सर्वांना भेटता येते. पुढील वर्षाचा संकल्प करता येतो. मतदारसंघात पंधरा हजार बांधकाम कामगारांची नोंदणी झाली असून, रामराज्य रथाच्या माध्यमातून गावोगावी लोकांना शासकीय योजनांचा लाभ देण्यात येत आहे.

कामगार मंत्री सुरेश खाडे यांच्या उपस्थितीत लवकरच वीस हजार लोकांना एकाच वेळी लाभ देण्यात येणार आहे. उपमुख्यमंत्री देवेंद्र फडणवीस व आ. जयकुमार गोरे यांच्या माध्यमातून तीनशे कोटी रुपयांचा निधी उपलब्ध झाला आहे.

विक्रमशील कदम म्हणाले, आ. गोरे व धैर्यशील कदम यांच्या मार्गदर्शनाखाली, सर्वसामान्य माणूस केंद्रबिंदू मानून, अखंडपणे कार्यरत राहणार आहे. त्यासाठी सर्वांनी पाठीशी राहावे. जितेंद्र मोरे यांनी सूत्रसंचालन केले. संजय घोरपडे यांनी आभार मानले.