पिंपरी  – रक्षाबंधन सण अवघ्‍या आठवडाभरावर आला आहे. रक्षाबंधन सणाची चाहूल लागताच पिंपरी-चिंचवडमधील बाजारपेठांमध्ये उत्साहाचे वातावरण निर्माण झाले आहे.

राख्यांच्या खरेदीसाठी बहिणींची लगबग वाढली आहे. पिंपरी, चिंचवड आणि भोसरी परिसरातील बाजारपेठा रंगीबेरंगी राख्यांनी सजल्या आहेत. यंदा पारंपरिक राख्यांसोबतच कार्टून, एलईडी, ब्रेसलेट आणि मेटल राख्यांना विशेष मागणी आहे.

लहान मुलांच्या पसंतीचा विचार करून विक्रेत्यांनी विविध कार्टून राख्या बाजारात आणल्या आहेत. छोटा भीम, स्पायडरमॅन, डोरेमोन आणि मोटू-पतलूच्या राख्या मुलांचे लक्ष वेधून घेत आहेत. काही राख्यांमध्ये एलइडी लाइट्सही आहेत. त्यामुळे या राख्यांना बच्चे कंपनीकडून पसंती मिळत आहे.

तरुणाईसाठी यंदा ब्रेसलेट राख्यांचा ट्रेंड पाहायला मिळत आहे. मेटल फिनिश, लेदर बेल्ट आणि स्टायलिश डिझाईनच्या राख्या उपलब्ध आहेत. ‘ब्रदर’, ‘महाकाल’ अशा शब्दांच्या राख्याही बाजारात आहेत. साधेपणापेक्षा हटके लूकला तरुणांकडून पसंती दिली जात आहे.

पारंपरिक राख्यांची मागणीही कायम आहे. रेशमी धागे, मोती, कुंदन, जरदोजी आणि स्टोन वर्कच्या राख्या महिलांचे लक्ष वेधून घेत आहेत. चंदनाच्या सुगंधी राख्यांनाही मागणी आहे. विविध किंमतींमध्ये राख्या उपलब्ध असल्याने प्रत्येक बजेटनुसार खरेदी करता येत आहे.

चांदीच्या राख्यांना विशेष पसंती
पिंपरी आणि चिंचवड परिसरातील सराफ बाजारात चांदीच्या राख्यांचीही विक्री वाढली आहे. नाजूक नक्षीकामाच्या राख्या उपलब्ध आहेत. नाव कोरून घेण्याची सुविधाही काही विक्रेत्यांकडून दिली जात आहे. आकर्षक गिफ्ट बॉक्समुळे चांदीच्या राख्यांना वेगळे महत्त्व मिळाले आहे.

राख्यांचे अंदाजे दर
साध्या आणि रेशमी राख्या १० ते ३० रुपये, फॅन्सी आणि डिझायनर राख्या ३० ते १०० रुपये, कार्टून व एलईडी राख्या ३० ते ८० रुपये, मोती आणि कुंदन राख्या ५० ते १५० रुपये, तर ब्रेसलेट व मेटल राख्या ५० ते २०० रुपयांपर्यंत उपलब्ध आहेत. डिझाइन आणि वजनानुसार चांदीच्या राख्यांचे दर साधारण ५०० रुपयांपासून २,५०० रुपयांपेक्षा अधिक आहेत.

परगावी असलेल्या भावांसाठी ऑनलाइन पर्याय
शहराबाहेर किंवा परदेशात राहणाऱ्या भावांसाठीही बहिणींनी तयारी सुरू केली आहे. पोस्ट आणि कुरिअरद्वारे राख्या पाठविण्याचे प्रमाण वाढले आहे. ऑनलाइन खरेदीलाही चांगला प्रतिसाद मिळत आहे.

काहीजण राखीसोबत मिठाई आणि भेटवस्तू थेट भावाच्या पत्त्यावर पाठवत आहेत. रक्षाबंधन सण सात दिवसांवर आल्‍याने पुढील काही दिवसांत बाजारपेठांमधील गर्दी आणखी वाढण्याची शक्यता विक्रेत्यांकडून व्यक्त होत आहे. त्यामुळे पिंपरी-चिंचवडमध्ये राख्यांच्या खरेदीचा उत्साह चांगलाच रंगला आहे.

Zilla Parishad Teacher: जिल्हा परिषदेच्या ५० शिक्षकांना सिंगापूरची वारी