Zilla Parishad Teacher: पुणे जिल्हा परिषदेच्या शिक्षण विभागाने आखलेला ‘ग्लोबल गुरुजी’ हा महत्त्वपूर्ण उपक्रम आता अंतिम टप्प्यात पोहोचला असून, येत्या ५ सप्टेंबर रोजी (शिक्षक दिनानिमित्त) आंतरराष्ट्रीय अभ्यासदौऱ्यासाठी निवड झालेल्या ५० शिक्षकांची अधिकृत घोषणा केली जाणार आहे. या योजनेअंतर्गत जिल्ह्यातील निवडक शिक्षक यंदाच्या दिवाळीच्या सुट्ट्यांमध्ये, म्हणजेच १५ ते २३ नोव्हेंबरदरम्यान सिंगापूरच्या सात दिवसांच्या विशेष शैक्षणिक प्रशिक्षणासाठी रवाना होणार आहेत.

जिल्हा परिषदेचे मुख्य कार्यकारी अधिकारी गजानन पाटील यांनी ही माहिती दिली. शिक्षकांना आंतरराष्ट्रीय पातळीवरील आधुनिक अध्यापन पद्धती आणि नवकल्पनांचा प्रत्यक्ष अनुभव घेता यावा, या उद्देशाने या उपक्रमाची आखणी करण्यात आली आहे.

३ कोटी ५० लाख रुपयांची भरघोस तरतूद असलेल्या या उपक्रमासाठी जिल्हाभरातून प्रतिसाद मिळाला. ९ ऑगस्ट रोजी जिल्ह्यातील १,२१२ शिक्षकांपैकी १,०२५ शिक्षकांनी आॅनलाइन परीक्षा दिली होती. त्यातून गुणवत्तेच्या आधारे निवडलेल्या १३६ शिक्षकांच्या आणि केंद्रप्रमुखांच्या ‘टाटा सामाजिक विज्ञान संस्थेच्या’ तज्ज्ञ समितीमार्फत मुलाखती पूर्ण झाल्या आहेत.

अंतिम ५० जणांच्या यादीत ४५ शिक्षकांसह तीन केंद्रप्रमुख, एक विस्तार अधिकारी, एक गट शिक्षण अधिकारी आणि एका ‘डाएट’ प्रतिनिधीचा समावेश असेल. ही निवड करताना केवळ मुलाखत नव्हे, तर शिक्षकांची मागील वर्षातील कामगिरी, शाळेचे गुणवत्ता मूल्यांकन, विद्यार्थ्यांना मिळालेल्या शिष्यवृत्ती, नाविन्यपूर्ण उपक्रम, पटसंख्या वाढ आणि समुदाय सहभाग यांसारख्या वस्तुनिष्ठ निकषांचा आधार घेतला जात आहे.

सिंगापूर दौऱ्यासाठी निवड न झालेल्या उर्वरित गुणवत्ताधारक शिक्षकांना निराशा न होता कर्नाटक, केरळ आणि हिमाचल प्रदेश यासह अन्य राज्यांतील यशस्वी शैक्षणिक मॉडेल्सचा अभ्यास करण्याची संधी दिली जाणार आहे.

सिंगापूरहून परतल्यानंतर हे सर्व शिक्षक ‘शिक्षण दूत’ म्हणून काम पाहतील आणि आंतरराष्ट्रीय स्तरावरील प्रगत तंत्रज्ञान व अध्यापन पद्धतींचा प्रसार संपूर्ण पुणे जिल्ह्यातील शाळांमध्ये करतील, असेही गजानन पाटील यांनी सांगितले.