शिरूर: शिरूर तालुक्यातील रावडेवाडी परिसरात एका मेंढपाळावर कोयत्याने हल्ला करून गंभीर जखमी करण्यात आले. ही धक्कादायक घटना 18 मे रोजी रात्री 10.30 वाजता घडली असून, या प्रकरणी शिरूर पोलीस ठाण्यात गुन्हा दाखल करण्यात आला आहे.

फिर्यादी सोमनाथ रघुनाथ रुपणेर (वय 35 वर्ष ) व्यवसाय शेती व मेंढपाळ, रा. कान्हूर मेसाई, गारकुलवाडी, ता. शिरूर हे आपल्या कुटुंबासमवेत मेंढ्यांच्या वाघूरीजवळ झोपले असताना, आरोपी अमोल उर्फ युवराज लक्ष्मण तांबे (रा. रावडेवाडी) याने त्यांच्या वाघूरीतून एक कोकरू उचलून नेले. याबाबत विचारणा केली असता, आरोपीने संतापून सोमनाथ यांच्यावर कोयत्याने हल्ला केला.

हल्ला करताना सोमनाथ यांनी डाव्या हाताने बचाव केला असता त्यांना कोपराजवळ, पोटरीला आणि तळहाताला गंभीर जखमा झाल्या. यानंतर आरोपीने पुन्हा हल्ला करताना त्यांच्या कपाळालाही इजा केली. दरम्यान, पत्नी सुमन यांनी सोडवण्याचा प्रयत्न केला असता आरोपीने त्यांनाही शिवीगाळ करत “पोलिसांत केस केलीस तर जीवंत ठेवणार नाही” अशी धमकी दिली.

या प्रकरणी शिरूर पोलीस ठाण्यात गुन्हा दाखल करण्यात आला आहे. पोलीस हवालदार वारे यांनी गुन्हा नोंदवला असून या घटनेचा पुढील तपास आगलावे करीत आहेत.