Donald trump : गाझामधील उर्वरित सर्व २० ओलिसांना दोन वर्षांच्या युद्धानंतर हमासच्या कैदेतून सोडण्यात आले आहे आणि ते इस्रायलला परतले आहेत. २८ मृत ओलिसांचे मृतदेह गाझामध्येच आहेत, परंतु अमेरिकेच्या मध्यस्थीने केलेल्या युद्धबंदी कराराच्या अटींनुसार हमासने ते परत करणे आवश्यक आहे.

या प्रसंगी अमेरिकेचे अध्यक्ष डोनाल्ड ट्रम्प यांनी तेल अवीवमधील अशा कुटुंबांची भेट घेतली ज्यांच्या प्रियजनांना ओलिस ठेवण्यात आले होते किंवा त्यांचे निधन झाले होते. ट्रम्प यांनी नेसेट (संसदे) ला देखील संबोधित केले. आपल्या भाषणात ट्रम्प म्हणाले की, दोन वर्षांनंतर अखेर बंदुका शांत झाल्या आहेत.

अमेरिकेचे अध्यक्ष ट्रम्प यांनी आपल्या भाषणाची सुरुवात असे म्हणून केली की, “अंधार आणि बंदिवासात दोन वेदनादायक वर्षे घालवल्यानंतर, २० धाडसी बंधक त्यांच्या कुटुंबात परतत आहेत आणि हे गौरवास्पद आहे.

आज बंदुका शांत झाल्या आहेत, सूर्य उगवला आहे. हा युद्धाचा शेवट नाही तर एका नवीन युगाची सुरुवात आहे.” नेसेटला संबोधित करताना, अध्यक्ष ट्रम्प यांनी इस्रायली पंतप्रधान बेंजामिन नेतान्याहू यांच्याबद्दल विनोदही केला.

नेतान्याहू यांना महान म्हणत ट्रम्प म्हणाले, “मी असाधारण धाडस आणि देशभक्तीच्या माणसाबद्दल कृतज्ञता व्यक्त करू इच्छितो. त्यांच्या भागीदारीने हा महत्त्वपूर्ण दिवस शक्य करण्यात मोठे योगदान दिले आहे. आणि तुम्हाला माहिती आहे, मी फक्त एकाच व्यक्तीबद्दल बोलत आहे: पंतप्रधान बेंजामिन नेतान्याहू.”

ट्रम्प यांनी हे सांगताच संसद टाळ्यांचा कडकडाट झाला आणि ट्रम्प यांनी नेतान्याहू यांना उभे राहण्यास सांगितले. त्यानंतर ते पुढे म्हणाले, “आणि मी तुम्हाला सांगू इच्छितो की, त्यांच्याशी व्यवहार करणे सोपे नाही. पण हेच त्यांना महान बनवते,” बीबी, खूप खूप धन्यवाद.”

मध्य पूर्व बदलले आहे !
ट्रम्प यांनी मध्य पूर्वेचे वर्णन “बदललेला प्रदेश” असे केले. त्यांनी सांगितले की त्यांना नवीन राजनैतिक करारांसाठी संधी मिळवायची आहे. त्यांनी सांगितले की “बदललेल्या प्रदेशावर” पहाट उजाडत आहे आणि “एक सुंदर आणि उज्ज्वल भविष्य अचानक तुमच्या आवाक्यात आहे.”

ट्रम्प यांनी त्यांच्या प्रशासनादरम्यान स्वाक्षरी केलेल्या अब्राहम करारांचा उल्लेख केला आणि ते त्यांचा विस्तार करण्यास उत्सुक असल्याचे सांगितले. या कराराने इस्रायल आणि त्याच्या अरब शेजारी देशांमधील राजनैतिक संबंध सामान्य केले आहेत. त्यांच्या भाषणात त्यांनी म्हटले की हमाससोबतचा करार हा दशकांपासून चालत आलेला शत्रुत्व संपवण्यासाठी एक प्रेरणादायी क्षण असावा.