प्रभात वृत्तसेवा सातारा – क्रीडा महर्षी साहेबराव पवार यांच्या शतकपूर्ती वर्षानिमित्त भारतीय शैली कुस्ती महासंघ नवी दिल्ली व राजेश्वर प्रतिष्ठान सातारा यांच्यावतीने राज्यात प्रथमच सातारा येथील छत्रपती शाहू स्टेडियमवर दि. २० ते २३ नोव्हेंबर अखेर हिंदकेसरी स्पर्धेचा थरार रंगणार आहे. पुरुष व महिला गटात होणाऱ्या या स्पर्धेसाठी सर्वात मोठी बक्षिसे दिली जाणार आहेत. देशभरातून २६ राज्याचे संघ सहभागी होणार असल्याची माहिती महासंघाचे राष्ट्रीय महासचिव गौरव रोशनलाल व निमंत्रक दीपक पवार यांनी सातारा येथे पत्रकार परिषदेत दिली. हिंदकेसरी कुस्ती स्पर्धा महाराष्ट्रात पहिल्यांदाच सातारा येथे होत असून या स्पर्धेसाठी देशभरातून २६ राज्याचे संघ पुरूष व महिला त्याचप्रमाणे भारतीय वायू दल, वायूसेना, एअर फोर्स, बीएसएफ, रेल्वे, आयटीबीपी, असे सात सेवा संघ येणार आहेत. सुमारे ५०० पुरूष मल्ल व २५० महिला मल्ल सहभागी होणार आहेत. ही स्पर्धा पांरपारिक पध्दतीने मातीच्या दोन आखाड्यावर होणार आहे. स्पर्धेसाठी महाराष्ट्राचे ३०, इंटरनॅशनल व दिल्ली येथून आंतरराष्ट्रीय दर्जाचे ८० पंच येणार असल्याचे गौरव रोशनलाल यांनी सांगितले. पुरूष गटातील हिंद केसरी कुस्ती स्पर्धा ८५ ते १४० किलो वजन गटात होणार असून प्रथम क्रमांकास थार गाडी , चांदीची गदा, द्वितीय क्रमांकास ट्रॅक्टर, तृतीय क्रमांकास बुलेट व दुचाकी बक्षिस दिले जाणार आहे. ५५ ते ८५ किलो पुरूष वजन गटात प्रथम क्रमाकांस दुचाकी, द्वितीय क्रमांकास ५० हजार रुपये, तृतीय क्रमांकास २० हजार रुपये. महिला गटातील हिंद केसरी कुस्ती स्पर्धा ६५ ते ९० किलो वजन गटात होणार असून प्रथम क्रमांकास मारूती कार व चांदीची गदा, द्वितीय क्रमांकास ॲक्टीव्हा, तृतीय क्रमांकास ५० हजार रुपये व २५ हजार रुपये तर ४८ ते ६२ किलो महिला वजन गटात प्रथम क्रमांकास ॲक्टिव्हा, द्वितीय क्रमांकास ५० हजार रुपये , तृतीय क्रमांकास २० हजार रुपयांचे बक्षिस दिले जाणार आहे. सर्वात मोठी बक्षीस दिली जाणारी ही हिंदकेसरी स्पर्धा देशातील पहिली आहे. स्पर्धेसाठी समारे ५ कोटी रुपये खर्च येणार असून सुमारे ५५ लाख रुपयांची बक्षिसे साहेबराव पवार कुटुंबियांमार्फत दिली जाणार असल्याचे दीपक पवार यांनी सांगितले.सातारा शहरात होणाऱ्या या स्पर्धेसाठी मोठी गर्दी होणार असून त्यादृष्टीने नियोजन सुरू आहे. जिल्ह्यातील नागरिकांना एक प्रकारे नेत्रदीपक कुस्त्या बघण्याची पर्वणी आहे. त्यासाठी सर्वानी सहभागी होवून स्पर्धेचा आनंद घ्यावा, असे आवाहन गौरव रोशनला, दीपक पवार, सुधीर पवार यांनी केले आहे. पत्रकार परिषदेस महाराष्ट्र राज्य भारतीय हौशी कुस्ती संघाचे सचिव मोहन खोपडे, ग्यानी सिंग, दादा थोरात, आबा सूळ, चंद्रकांत सूळ, बापू लोखंडे, संदीप मांडवे, माणिक पवार, किरण भगत, जीवन कापले यांच्यासह पदाधिकारी उपस्थित होते. ओम बिर्लांच्या हस्ते होणार स्पर्धेचे उदघाटन.. हिंदकेसरी कुस्ती स्पर्धेचे दि. २० नोव्हेंबर रोजी लोकसभेचे सभापती ओम बिर्ला यांच्या हस्ते उदघाटन होणार आहे. केंद्रीय मंत्री नितीन गडकरी हे स्पर्धा कालावधीत भेट देणार आहेत. स्पर्धेच्या समारोप कार्यक्रमास राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार, राष्ट्रवादीचे अध्यक्ष खा. शरद पवार यांच्यासह जिल्ह्यातील सर्व मंत्री, आमदार, खासदार उपस्थित राहणार असल्याचे दीपक पवार यांनी सांगितले. राजकारण व पक्षविरहीत या स्पर्धा आहेत.
