हडपसर : आज संपूर्ण देश पंतप्रधान नरेंद्र मोदी यांच्या विकासावर विश्वास ठेवत आहे.महाराष्ट्र राज्यातही सर्वाधिक जागांवर भारतीय जनता पक्ष आणि मित्र पक्षांचे उमेदवार विजयी होतील.कारण कॉग्रेस फक्त खोटे बोलण्याचे काम करत आहे. हे लोकांच्या चांगलेच लक्षात आले आहे. कॉग्रेस एवढे खोटे बोलत आहे की ते खोटे बोलत असल्याचे लगेचच लक्षात येते आहे.परंतु पंतप्रधान नरेंद्र मोदी यांच्या गॅरंटीवर सर्वांचा विश्वास आहे.

कारण पंतप्रधान मोदी जे बोलतात ते करतात त्यांना ताकद देण्यासाठी आपण मतदान करावे, असे आवाहन हरियाणा राज्याचे मुख्यमंत्री नायब सिह सैनी यांनी केले. भारतीय जनता पार्टी हडपसर विभागाच्या वतीने हरियाणाचे नवनिर्वाचित मुख्यमंत्री नायब सिह सैनी यांचा जाहीर सत्कार तसेच हडपसर विधानसभा मतदार संघातील महायुतीचे उमेदवार चेतन तुपे यांच्या प्रचारार्थ भारतीय जनता पक्षाच्या वतीने आयोजित मेळाव्यात हरियाणा राज्याचे मुख्यमंत्री नायब सिंह सैनी बोलत होते.

यावेळी आमदार योगेश टिळेकर, महिला आयोगाच्या अध्यक्षा रुपाली चाकणकर, माजी नगरसेविका रंजना टिळेकर, ओबीसी मोर्चाचे माजी प्रदेशाध्यक्ष विकास रासकर, सरचिटणीस सुभाष जंगले, मंडल अध्यक्ष संदीप दळवी, अनिल येवले,सुनिल बनकर, भूषण तुपे, जीवन जाधव, संदीप लोणकर, गणेश घुले ,शिवराज घुले ,आण्णा धारवाडकर,बाळासाहेब घुले आदींसह भारतीय जनता पक्षाचे तसेच महायुतीचे पदाधिकारी व कार्यकर्ते मोठ्या संख्येने उपस्थित होते.

यावेळी समाजाच्या वतीने आमदार योगेश टिळेकर यांनी मुख्यमंत्री सैनी यांचा सन्मान केला. दरम्यान संत सावता क्रांती परिषदेच्या बोधचिन्हाचे अनावरण करण्यात आले. आमदार योगेश टिळेकर म्हणाले की केंद्रात आणि राज्यात समविचाराचे सरकार राहिल्याने विकास कामे वेगाने होतात. त्यामुळे पुन्हा एकदा महायुतीचे सरकार सत्तेत येण्यासाठी हडपसर मधून चेतन तुपे यांना दुसऱ्यांदा विजयी करायचे आहे. आमदार योगेश अण्णा टिळेकर आणि मी स्वतः आपल्याला पुढील पाच वर्ष चांगला विकास करून दाखवू, असा विश्वास महायुतीचे उमेदवार चेतन तुपे यांनी व्यक्त केला.