इंदापूर : नवरात्रीच्या मंगलमय पर्वात भक्ती, परंपरा आणि स्त्रीशक्तीचा जागर घडविणाऱ्या गरबा-दांडियाच्या माध्यमातून इंदापूर शहरातील महिलांना आनंदाचे व्यासपीठ उपलब्ध होणार आहे. इंदापूर नगर परिषदेचे नगराध्यक्ष भरत शहा मित्र परिवाराच्या वतीने बुधवार, दि. १४ रोजी भार्गवराम बगीचा येथे ‘गरबा व दांडिया महोत्सव २०२६’ आयोजित करण्यात आला आहे.

नवरात्रोत्सव म्हणजे आदिशक्तीचा जागर, स्त्रीशक्तीचा सन्मान आणि समाजातील एकोपा दृढ करणारा उत्सव. याच धार्मिक आणि सांस्कृतिक परंपरेला सामाजिक उत्सवाचे स्वरूप देण्याच्या उद्देशाने या महोत्सवाचे आयोजन करण्यात आले आहे. इंदापूर शहरातील महिलांनी एकत्र येत गरबा-दांडियाच्या तालावर आनंदोत्सव साजरा करावा, तसेच नवरात्रीतील उत्साह आणि सांस्कृतिक परंपरेचा अनुभव घ्यावा, असे आवाहन आयोजकांनी केले आहे.

गरबा आणि दांडिया ही केवळ मनोरंजनाची साधने नसून भारतीय संस्कृतीतील सामूहिक आनंद, भक्तिभाव आणि सामाजिक एकतेचे प्रतीक मानली जातात. अशा उपक्रमांतून महिलांना दैनंदिन धावपळीतून विरंगुळा मिळण्या बरोबरच परस्पर संवाद, मैत्री आणि सामाजिक सलोखा वाढविण्याची संधी मिळते. शहरातील महिलांना एकाच व्यासपीठावर आणत नवरात्रोत्सवाचा आनंद द्विगुणित करण्याचा आयोजकांचा प्रयत्न आहे.

या महोत्सवाच्या आयोजनात हिरकणी ग्रुपच्या वतीने हेमलता माळुंजकर, हर्षदा ढोले, स्वाती नागपुरे, अर्चना शिंदे, प्राजित परदेशी, शीतल कांबळे, सोनाली बोराटे, मनीषा घोडके, सपना वाघमारे आणि कृष्णा शिंगटे यांचा सहभाग आहे. इंदापूर शहरातील महिलांनी मोठ्या संख्येने उपस्थित राहून या सांस्कृतिक सोहळ्यात सहभागी व्हावे आणि नवरात्रोत्सवाचा आनंद मनमुराद लुटावा, असे आवाहन भरत शहा मित्र परिवाराच्या वतीने करण्यात आले आहे.

नवरात्रोत्सवातून स्त्रीशक्तीचा सन्मान

नवरात्र म्हणजे आदिमायेच्या शक्तीची उपासना आणि स्त्रीशक्तीप्रती आदर व्यक्त करण्याचा मंगलमय काळ. या पर्वात महिलांसाठी गरबा-दांडिया महोत्सवाचे आयोजन करून त्यांना आनंद, सांस्कृतिक अभिव्यक्ती आणि एकत्र येण्याची संधी उपलब्ध करून देण्याचा प्रयत्न करण्यात आला आहे. इंदापूरचे नगराध्यक्ष भरत शहा यांच्या मित्र परिवाराच्या पुढाकारातून आयोजित हा उपक्रम धार्मिक परंपरेला सामाजिक सहभागाची जोड देणारा ठरणार आहे. उत्सवाच्या माध्यमातून महिलांचा सन्मान, परस्परांतील जिव्हाळा आणि शहरातील सामाजिक सलोखा अधिक दृढ व्हावा, हा या आयोजनामागील उद्देश आहे.