लोणंद – लोणंद-निरा रोडवर पाडेगाव हद्दीत पिकअप गाडीने दिलेल्या जोरदार धडकेत रस्त्याकडेने जात असलेला सायकलस्वार गंभीर जखमी होवून जागीच ठार झाल्याची दुदैवी घटना घडली आहे. दशरथ गणपत शिंदे वय 65, रा. पिंपरे बुद्रूक, ता. खंडाळा अपघातात मृत झालेल्या सायकलस्वाराचे नाव आहे. याप्रकरणी पोलिसांनी पिकअप चालकास ताब्यात घेतले आहे.

याबाबत लोणंद पोलिसांनी दिलेली माहिती अशी, खंडाळा तालुक्‍यातील पाडेगाव कॅनालपासून काही अंतरावर लोणंद-निरा रोडवरील एका रोपवाटिकेच्या समोर बुधवार दि. 21 रोजी संध्याकाळी पाच वाजताच्या सुमारास हा अपघात झाला. यामध्ये अशोक लेलंड दोस्त पिकअप (क्रमांक एमएच 12 एसएक्‍स 6886) भरधाव चालला होता. पिकअपने यावेळी बाजूने जात असलेल्या सायकलस्वार दशरथ गणपत शिंदे यांना पाठीमागून जोरदार धडक दिली.

या अपघातात सायकलस्वार शिंदे हे गंभीर जखमी झाले व त्यांचा जागीच मृत्यू झाला. अपघातानंतर लोणंद पोलिसांनी मृतदेह शवविच्छेदनासाठी लोणंद प्राथमिक आरोग्य केंद्रात पाठवला आहे. पिकअप चालक रवींद्र सखाराम शिंदे (रा.लिंब कोंडवली, जि. सातारा) याला पिकअप गाडीसह लोणंद पोलीसांनी ताब्यात घेतले असून त्याच्यावर संध्याकाळी उशिरापर्यंत गुन्हा दाखल करण्याचे काम सुरु होते.