कोल्हापूर : राज्यात एकीकडे शरद पवारांनी अजित पवारांबाबत केलेल्या विधानावरून राजकीय गोंधळ सुरु आहे तर दुसरीकडे राष्ट्रवादीच्याच दोन्ही गटातील नेत्यांमध्ये शाब्दिक चकमक पाहायला मिळत आहे. कोल्हापूरमध्ये झालेल्या शरद पवारांच्या सभेत आमदार जितेंद्र आव्हाड यांनी अजित पवारांबरोबर गेलेल्या नेत्यांवर टोलेबाजी केली होती. त्यावरून आता हसन मुश्रीफ यांनी जितेंद्र आव्हाडांना चांगलेच सुनावले आहे.

जितेंद्र आव्हाडांनी या सभेत केलेल्या भाषणातून अजित पवार गटाला कोल्हापुरी चपलेची आठवण करून दिली. “महाराष्ट्रात आता गद्दारी दिसू लागली आहे. हे साप बिळात होते. बिळातले साप आता बाहेर पडू लागले आहेत. या सापांना ठेचण्यासाठी आपल्याला पायतानाचा वापर करावा लागेल. तुम्हा सगळ्यांना माहिती आहे या कोल्हापुरात सर्वात प्रसिद्ध काय आहे? पायतान! या पायतानाचा उपयोग अख्या महाराष्ट्राने करावा अशी माझी इच्छा आहे”, असे जितेंद्र आव्हाड म्हणाले होते. त्यासोबतच “आज कोल्हापुरातल्या सगळ्या वस्तादांना भेटायला आमचा वस्ताद आला आहे. आमचा वस्ताद लय भयंकर आहे. त्यांनी जर कोणाला कुस्तीचं आव्हान दिलं तर समोरच्या पैलवानाची अवस्था बिकट होते”, असेही ते शरद पवारांना उद्देशून म्हणाले.

दरम्यान, जितेंद्र आव्हाडांच्या यावक्तव्यावर हसन मुश्रीफ यांनी खोचक प्रत्युत्तर दिले. “जितेंद्र आव्हाड हे मला फार ज्युनिअर आहेत. त्यांनी शरद पवारांवर काय जादू केली हे मला माहिती नाही. ठाण्यात राष्ट्रवादी काँग्रेस पक्ष संपवण्याचं काम त्यांनी केलं आहे. अशी भाषा त्यांनी बोलायला नको होती”, असे मुश्रीफ म्हणाले.

“जेव्हा एकनाथ शिंदे सगळे आमदार घेऊन गुवाहाटीला गेले, तेव्हाच राष्ट्रवादी काँग्रेसच्या ५३ आमदारांनी शरद पवारांना पत्र लिहिलं होतं की आम्हालाही सत्तेत जाण्याची परवानगी द्या. म्हणजे गृहनिर्माण खातं किती ह्रदयाला कवटाळून बसले होते हे. मग तेव्हा कुठे गेला होता दादा तुझा धर्म? तेव्हा कशी सही केली होती तुम्ही? कोल्हापुरात कोल्हापुरी चप्पल नाही, कापशीची चप्पल प्रसिद्ध आहे. ती करकर वाजते. ती बसली की कळेल त्याला”, असा टोला यावेळी हसन मुश्रीफ यांनी जितेंद्र आव्हाडांना लगावला.