मंचर : आंबेगाव तालुक्यातील मंचर येथील ज्येष्ठ कवयित्री स्व. शांता शेळके यांचा ऐतिहासिक वाडा पावसामुळे जीर्ण होऊन त्याची पडझड झाली आहे. या वाड्याचे नूतनीकरण करून शांता शेळके यांच्या नावाने सुसज्ज वाचनालय तसेच विद्यार्थ्यांसाठी अभ्यासिका सुरू करण्यात येणार असल्याची माहिती माजी गृहमंत्री दिलीप वळसे पाटील यांनी रविवार, दि.२३ रोजी सकाळी दिली.

पावसामुळे पडझड झालेल्या वाड्याची वळसे पाटील यांनी पाहणी केली. यावेळी भीमाशंकर कारखान्याचे अध्यक्ष बाळासाहेब बेंडे, उपनगराध्यक्ष संदीप थोरात, शरद बँकेचे संचालक अजय घुले, अॅड. राहुल पडवळ, नगरसेवक धनेश मोरडे, जगदीश घिसे, विकास बाणखेले, बादशहाभाई ईनामदार, वसंतराव नाटे, सेवानिवृत्त शिक्षक सुधाकर काळे गुरुजी, वसंत बनबेरू, सुरेश मेहत्रे, सतीश ढुमणे, पांडुरंग निघोट यांच्या सह मंचरमधील ग्रामस्थ उपस्थित होते.

वळसे पाटील यांनी शांता शेळके यांच्या वंशजांशी वाड्याच्या नूतनीकरणाबाबत चर्चा केली. ऐतिहासिक वास्तूचे मूळ स्वरूप जपून आवश्यक दुरुस्ती व नूतनीकरण करण्याच्या दृष्टीने संबंधित अधिकाऱ्यांना त्यांनी सूचना दिल्या. ज्येष्ठ कवयित्री स्व. शांता शेळके यांनी मराठी साहित्य, कविता आणि गीतलेखनाच्या क्षेत्रात मोलाचे योगदान दिले आहे. त्यांच्या स्मृती आणि साहित्यिक वारशाचे जतन करण्यासाठी वाड्याचे संवर्धन करून येथे वाचनालय व अभ्यासिका सुरू करण्याचा प्रयत्न केला जाणार आहे. या उपक्रमामुळे विद्यार्थ्यांना अभ्यासासाठी सुविधा मिळण्याबरोबरच नव्या पिढीला शांता शेळके यांच्या साहित्यिक कार्याची ओळख होण्यास मदत होणार आहे.

शांता शेळके यांचा वाडा ही मंचरची साहित्यिक ओळख आहे. त्याचे नूतनीकरण करून येथे वाचनालय व अभ्यासिका सुरू करण्यात येईल. या माध्यमातून त्यांचा साहित्यिक वारसा पुढील पिढ्यांपर्यंत पोहोचविण्याचा प्रयत्न केला जाईल.
– दिलीप वळसे पाटील, माजी गृहमंत्री.