मुंबई  – कथित खिचडी घोटाळा प्रकरणात ठाकरे गटाचे पदाधिकारी सूरज चव्‍हाण यांच्‍याविरोधात अंमलबजावणी संचालनालय अर्थात ईडीने शुक्रवारी आरोपपत्र दाखल केले. मनी लाँडरिंग प्रतिबंधक कायद्यांतर्गत (पीएमएलए) खटल्यांसाठी विशेष न्यायाधीश एमजी देशपांडे यांच्यासमोर आरोपपत्र दाखल करण्यात आले आहे.

सूरज चव्हाण यांना 17 जानेवारी रोजी अटक करण्यात आली असून सध्या ते न्यायालयीन कोठडीत आहे. या प्रकरणी मुंबई पोलिसांच्या आर्थिक गुन्हे शाखेच्या तपासात मुंबई महानगरपालिकेने करोना काळात स्थलांतरितांना खिचडी पॅकेटच्या वितरणासाठी फोर्स वन मल्टी सर्व्हिसेसच्या बँक खात्यात 8.64 कोटी रुपये हस्तांतरित केले.

तपास एजन्सीनुसार, फोर्स वन मल्टी सर्व्हिसेसने 3.64 कोटी रुपयांच्या गुन्ह्यातून उत्पन्न मिळवले, त्यापैकी 1.25 कोटी रुपये चव्हाण यांच्या वैयक्तिक बँक खात्यात आणि 10 लाख रुपये त्यांच्या भागीदारी फर्म फायर फायटर्स एंटरप्रायझेसच्या बँक खात्यात वळवले.