Dr. Hemraj Shah passes away : समाजकारण, पत्रकारिता, साहित्य आणि सांस्कृतिक क्षेत्रात दीर्घकाळ निःस्वार्थपणे कार्य करणारे बहुआयामी व्यक्तिमत्त्व डॉ. हेमराज शाह यांचे निधन झाले आहे. ते ८४ वर्षांचे होते. त्यांच्या पश्चात दोन मुले, सुना आणि नातवंडे असा परिवार आहे. शिवाजी पार्क येथे त्यांच्या पार्थिवावर अंत्यसंस्कार करण्यात आले.

डॉ. शाह यांच्या निधनाने महाराष्ट्रातील गुजराती समाजासह सामाजिक, राजकीय, साहित्यिक आणि सांस्कृतिक क्षेत्रात मोठी पोकळी निर्माण झाली आहे. राष्ट्रवादी काँग्रेस पक्षाचे ज्येष्ठ नेते, त्यानंतर ठाकरेसेनेचे नेते तसेच महाराष्ट्र गुजराती समाज महामंडळाचे अध्यक्ष म्हणून त्यांनी विविध जबाबदाऱ्या सांभाळल्या होत्या.

मुंबईसह महाराष्ट्रातील गुजराती समाजाला एकत्र आणण्यासाठी त्यांनी सातत्याने प्रयत्न केले. बृहन्मुंबई गुजराती समाजाच्या माध्यमातून त्यांनी तब्बल १३९ गुजराती संस्थांचे फेडरेशन उभारले. महाराष्ट्र गुजराती समाज महामंडळाच्या स्थापनेपासून तब्बल ३५ वर्षे त्यांनी अध्यक्षपदाची धुरा सांभाळली.

शिर्डीच्या साईबाबा संस्थानाचे विश्वस्त आणि महाराष्ट्र राज्य गुजराती साहित्य अकादमीचे कार्यकारी अध्यक्ष म्हणूनही त्यांनी महत्त्वपूर्ण योगदान दिले. विश्व गुजराती समाज, द बुक मॅन्युफॅक्चरर्स असोसिएशन, कच्छ-शक्ती, उमरगाव गोशाळा आणि श्री वागड वीसा ओसवाल विकास समाज अशा विविध संस्थांमध्ये त्यांनी जबाबदाऱ्या पार पाडल्या.

महाराष्ट्रातील इतर मागासवर्गीय प्रवर्गात दहा विविध जातींचा समावेश करण्यासाठीही त्यांनी सातत्याने पाठपुरावा केला. स्तंभलेखक आणि संपादक म्हणून त्यांनी पत्रकारितेतही आपला ठसा उमटवला. सामाजिक आणि साहित्यिक क्षेत्रातील योगदानाबद्दल त्यांना विविध पुरस्कारांनी गौरवण्यात आले होते.

डॉ. हेमराज शाह यांचा जन्म २२ मार्च १९४१ रोजी कच्छ येथे झाला. मागील ८० वर्षांपासून ते मुंबईत राहत होते. सर जे. जे. स्कूल ऑफ अप्लाइड आर्टमध्ये त्यांनी एफ. वाय. पर्यंत शिक्षण घेतले. ब्रॅम्प्टन इंटरनॅशनल युनिव्हर्सिटी, कॅनडा येथून मानवता आणि सामाजिक कार्यासाठी त्यांना मानद पीएच.डी. प्रदान करण्यात आली होती.

फिल्म सेन्सॉर बोर्ड, मुंबई दुरुस्ती व पुनर्बांधणी मंडळ आणि विक्रीकर सल्लागार समिती यांसारख्या विविध संस्थांमध्ये त्यांनी सदस्य म्हणूनही काम केले. त्यांच्या निधनाने महाराष्ट्रातील गुजराती समाजाने एक मार्गदर्शक आणि सामाजिक बांधिलकी जपणारे व्यक्तिमत्त्व गमावले आहे.

Pune News : ५ लाखांची लाच घेताना पोलिस हवालादराला रंगेहाथ पकडले; ACB ची धडक कारवाई