Corona Maharashtra : गेल्या काही दिवसांपासून मुंबईसह महाराष्ट्रात कोरोनाबाधित रुग्णांची संख्या वाढत असल्याचे चित्र आहे. काल २४ मे रोजी ठाण्यातील एका २१ वर्षीय युवकाचा कोरोनामुळे मृत्यू झाल्याची घटना घडली होती. यानंतर आरोग्य प्रशासनाने नागरिकांना सावध राहण्याचे सांगितले आहे. गेल्या दोन दिवसांत महाराष्ट्रात एकूण ९३ नवीन कोरोनाबाधित रुग्णांची नोंद झाली आहे, यामुळे नागरिकांना सतर्क राहण्याचे आवाहन आरोग्य विभागाकडून करण्यात येत आहे. जानेवारी महिन्यापासून आतापर्यंत ४ रुग्ण कोरोनामुळे दगावल्याची माहिती समोर आली आहे. या मृत्यूमुखी पडलेल्या रुग्ण आधीच्या आजाराने ग्रस्त होत असल्याचा त्यांचा पूर्वइतिहास होता. या रुग्णांपैकी एकाला हायपोकॅल्सेमिक झटके असलेले नेफ्रोटिक सिंड्रोम होते. तर दुसऱ्याला कर्करोग होता. तिसऱ्याला स्ट्रोक (सेरेब्रोव्हस्कुलर रोग) आणि चौथा रुग्ण गंभीर मधुमेहाने त्रस्त होता. नव्याने आढळून आलेल्या सर्व रुग्णांमध्ये कोरोनाची सौम्य लक्षणे असून कोणालाही गंभीर लक्षणे नाहीत. यामुळे नागरिकांनी घाबरून न जाता योग्य ती खबरदारी घ्यावी, असे आवाहन प्रशासनाकडून करण्यात आले आहे. जानेवारी महिन्यापासून महाराष्ट्रात एकूण ७,१४४ कोरोना चाचण्या करण्यात आल्या. यापैकी २५७ जणांचा कोरोना अहवाला सकारात्मक आला आहे. यापैकी ८७ रुग्ण बरे झाले असून त्यांना रुग्णालयाकडून डिस्चार्ज देण्यात आला आहे. महाराष्ट्रात नव्याने आढळून आलेल्या ९३ रुग्ण हे पुणे, मुंबई, नवी मुंबई, ठाणे येथील आहेत. सार्वजनिक ठिकाणी मास्कचा वापर करावा महाराष्ट्रात पुन्हा एकदा कोरोनाचे संक्रमण वाढते असल्याचे आकडेवारीवरून दिसत आहे. सार्वजनिक ठिकाणी नागरिकांनी मास्कचा वापर करावा, असे आवाहन प्रशासनाकडून करण्यात येत आहे. कोरोनाची लक्षणे दिसून आल्यास त्वरीत डॅाक्टरांचा सल्ला घ्यावा, असे देखील सांगण्यात आले आहे. नव्याने आढळून आलेले कोरोना रुग्ण मुंबई ४७, पुणे ३०, नवी मुंबई ७, ठाणे महापालिका क्षेत्रात ३, नागपूर महापालिका ६ तर राज्यात १६६ रुग्ण सक्रिय असून त्यांच्यावर उपचार सुरू आहेत. नवा व्हॅरियंट देशात कोरोनाच्या नव्या व्हॅरियंटची एन्ट्री झाले असून, NB.1.8.1 आणि LF.7 चे रुग्ण देशात रुग्ण आढळून येत आहेत. या व्हॅरिएंटचे रुग्ण तामिळनाडू आणि गुजरातमध्ये मिळाले आहे. INSACOG डेटामध्ये यासंदर्भात माहिती दिली आहे.
