Rafael Nadal Retirement : लाल मातीचा बादशहा नदालचा ‘टेनिस’ला अलविदा..! जाणून घ्या, कधी खेळणार शेवटचा सामना..?
Rafael Nadal Retirement : स्पेनचा स्टार टेनिसपटू राफेल नदालने गुरुवारी टेनिसमधून निवृत्ती जाहीर केली. पुरुष एकेरीत नदालच्या नावावर एकूण 22 ग्रँडस्लॅम जेतेपदे आहेत. केवळ सर्बियाच्या नोव्हाक जोकोविचने त्याच्यापेक्षा जास्त म्हणजेच 24 ग्रँडस्लॅम जिंकले आहेत. नदाल महान टेनिसपटूंपैकी एक आहे आणि त्याला लाल मातीचा बादशहा असेही म्हटले जाते.
नोव्हेंबरमध्ये होणाऱ्या डेव्हिस चषकाच्या फायनलनंतर निवृत्त होणार असल्याचे त्यांनी सांगितले. या वर्षाच्या सुरुवातीला पॅरिस ऑलिम्पिकनंतर तो एकही सामना खेळलेला नाही. डेव्हिस कपच्या अंतिम फेरीत स्पेनचा सामना नेदरलँडशी होणार आहे. हा सामना 19 ते 21 नोव्हेंबर दरम्यान खेळवला जाणार आहे.
व्हिडिओ जारी करून केली निवृत्तीची घोषणा….
नदालने सोशल मीडियावर एक व्हिडिओ शेअर करून निवृत्तीची घोषणा केली होती. यावेळी तो म्हणाला की, “आयुष्यातील प्रत्येक सुरुवातीचा शेवट असतो. करिअर संपवण्याची हीच योग्य वेळ आहे असे मला वाटते. इतक्या मोठ्या आणि यशस्वी कारकिर्दीची मी कल्पनाही केली नव्हती. आपली शेवटची स्पर्धा डेव्हिस कप फायनल असेल आणि आता मी माझ्या शेवटच्या सामन्याबद्दल खूप उत्सुक आहे. या सामन्यात मी माझ्या देशाचे प्रतिनिधित्व करेन.”
Mil gracias a todos
Many thanks to all
Merci beaucoup à tous
Grazie mille à tutti
谢谢大家
شكرا لكم جميعا
תודה לכולכם
Obrigado a todos
Vielen Dank euch allen
Tack alla
Хвала свима
Gràcies a tots pic.twitter.com/7yPRs7QrOi— Rafa Nadal (@RafaelNadal) October 10, 2024
नदालच्या नावावर 22 ग्रँडस्लॅम विजेतेपद…
फ्रेंच ओपनच्या तब्बल 14 विजेतेपदाशिवाय नदाल याने यूएस ओपनचे जेतेपद 4 वेळा आणि विम्बल्डन आणि ऑस्ट्रेलियन ओपनचे विजेतेपद प्रत्येकी 2 वेळा जिंकले. याशिवाय 2008 च्या ऑलिम्पिकमध्ये टेनिसमध्ये एकेरी प्रकारातही त्याने सुवर्णपदक जिंकले होते.
लाल मातीचा बादशहा का म्हटले जाते…?
फ्रेंच ओपन (French open) आणि राफेल नदाल (Rafael Nadal) यांचं एक वेगळ नातं आहे. फ्रेंच ओपन स्पर्धेत राफेल नदाल या नावाचा दबदबा आहे. कारण नदालची या स्पर्धेतील कामगिरीच तशी आहे. फ्रेंच ओपन स्पर्धा ही क्ले कोर्टवर (लाल माती) खेळली जाते आणि नदाल या कोर्टचा राजा आहे. कारण आतापर्यंत त्याने फ्रेंच ओपनची तब्बल 14 विजेतेपद पटकावली आहेत. एकूण करीयरमध्ये राफेल नदालच्या नावावर 22 ग्रँडस्लॅम विजेतेपद आहेत. त्यातली 14 ही केवळ फ्रेंच ओपनची आहेत.
