Wimbledon Towels : टेनिस जगतातील सर्वात प्रतिष्ठेची स्पर्धा म्हणजे ‘विंबल्डन‘. विंबल्डन म्हटलं की, डोळ्यांसमोर येतो तो हिरवागार सेंटर कोर्ट, खेळाडूंचे पांढरे शुभ्र कपडे आणि हातात उंचावलेली ग्रँडस्लॅम ट्रॉफी. पण गेल्या काही वर्षांत या स्पर्धेत आणखी एका गोष्टीची जगभरात तुफान चर्चा होत आहे, ती म्हणजे विंबल्डनचा ‘अधिकृत टॉवेल’(Wimbledon Towels).

नोव्हाक जोकोव्हिच, यानिक सिनर, इगा स्वियातेक यांसारखे जगातील अव्वल टेनिसपटू सामन्यादरम्यान जो टॉवेल वापरतात, तो आज या स्पर्धेची एक वेगळी ओळख बनला आहे. विशेष आणि अत्यंत अभिमानाची गोष्ट म्हणजे, या प्रतिष्ठित टॉवेलचा (Wimbledon Towels) थेट संबंध भारताशी आहे.

गुजरातच्या भूमीत विणला जातोय विंबल्डनचा सन्मान
सन १९८७ पासून ‘क्रिस्टी’ (Christy) हा लक्झरी होम टेक्स्टाईल ब्रँड विंबल्डनसाठी अधिकृत टॉवेल तयार करत आहे. सुरुवातीला या टॉवेल्सची निर्मिती ब्रिटनमध्येच केली जात होती. मात्र, भारतीय वस्त्रोद्योग क्षेत्रातील आघाडीची कंपनी असलेल्या ‘वेल्सपन’ने ‘क्रिस्टी’ ब्रँडचे अधिग्रहण केले आणि या टॉवेल्सचे उत्पादन थेट भारतामध्ये आणले.

आता गुजरात मधील ‘वापी’ येथील वेल्सपनच्या अत्याधुनिक कारखान्यात या जागतिक दर्जाच्या टॉवेल्सची निर्मिती केली जाते. त्यामुळे आज सेंटर कोर्टवर वापरल्या जाणाऱ्या प्रत्येक टॉवेलवर ‘मेड इन इंडिया’ची मोहोर उमटलेली पाहायला मिळते.

एक टॉवेल आणि १८ महिन्यांची कठोर मेहनत!
विंबल्डन टॉवेलची निर्मिती ही केवळ कापड विणण्याची साधी प्रक्रिया नाही, तर त्यामागे मोठी मेहनत असते. दरवर्षी स्पर्धा सुरू होण्याच्या तब्बल १८ महिने आधी या टॉवेलच्या डिझाइनवर काम सुरू होते. जागतिक फॅशनचे ट्रेंड्स, आकर्षक रंगसंगती आणि विंबल्डनची शतकानुशतकांची परंपरा यांचा मेळ घालून अंतिम डिझाइन निश्चित केले जाते. या डिझाइननुसार केवळ एक टॉवेल (Wimbledon Towels) पूर्णपणे तयार होण्यासाठी साधारण सात दिवसांचा कालावधी लागतो.

परंपरेसोबत बदलणारे रंग आणि फॅशन
यंदाच्या विंबल्डन हंगामासाठी त्यांचा पारंपरिक गडद हिरवा आणि जांभळा रंग तर कायम ठेवण्यात आलाच आहे, पण त्यासोबतच खास ‘स्ट्रॉबेरी थीम’वर आधारित नवीन रंगसंगती बाजारात आणली गेली आहे. यापूर्वी महिला खेळाडूंच्या टॉवेलसाठी ‘फ्युशिया पिंक’ सारख्या आकर्षक रंगांचा वापर करण्यात आला होता. विंबल्डनची मूळ संस्कृती जपत बदलत्या फॅशननुसार हे टॉवेल्स अधिक आकर्षक बनवले जातात.

दिग्गज खेळाडूंनाही लागलीये या टॉवेलची भूरळ!
हा टॉवेल आता केवळ घाम पुसण्याचे साधन राहिलेला नाही, तर ती एक मौल्यवान ‘स्मरणिका’ बनली आहे. अनेक दिग्गज खेळाडू सामना संपल्यानंतर हा टॉवेल स्वतःसोबत आठवण म्हणून घरी घेऊन जातात, तर काहीजण तो कोर्टवरील चाहत्यांना भेट देतात. खेळाडूंमध्ये याची क्रेझ इतकी प्रचंड आहे की, स्पर्धेत वापरल्या गेलेल्या हजारो टॉवेल्सपैकी केवळ १५ टक्के टॉवेल्सच आयोजकांकडे परत येतात, उर्वरित सर्व टॉवेल्स खेळाडू आणि चाहते सोबत घेऊन जातात.

काय आहे या टॉवेलचं वैशिष्ट्य?
वापीत तयार होणारा हा टॉवेल इतका खास असण्यामागे त्याचे तंत्रज्ञान आहे. हा टॉवेल (Wimbledon Towels) उच्च प्रतीच्या कापसापासून ‘शॉर्ट-लूप टेरी वीव्ह’ तंत्रज्ञानाने बनवला जातो. यामुळे तो कमालीचा मऊ, घाम अत्यंत वेगाने शोषून घेणारा आणि तितक्याच लवकर सुकणारा असतो. कितीही वेळा धुतला तरी त्याचा मऊपणा आणि दर्जा अजिबात कमी होत नाही. त्यामुळे टेनिस कोर्टव्यतिरिक्त घरात, बीचवर किंवा स्विमिंग पूलवर वापरण्यासाठीही याला जगात सर्वोत्तम मानले जाते.

विंबल्डनच्या मुख्य स्पर्धेत भारतीय खेळाडूंची संख्या मर्यादित असली, तरी सेंटर कोर्टवर जगातील सर्वोत्तम टेनिसपटूंच्या हातात दिसणाऱ्या या टॉवेलवर ‘Made in India’ ची छाप स्पष्टपणे चमकते. भारतीय वस्त्रोद्योगाची गुणवत्ता जागतिक पातळीवर किती श्रेष्ठ आहे, याचे हे एक उत्तम आणि अभिमानास्पद उदाहरण आहे.