न्हावरे : सध्या दुष्काळाने शेतकरी आधीच होरपळत असताना शिरुर तालुक्याच्या पुर्व भागातील एका गावात विद्युत वाहिनीची तार तुटून शॉर्टसर्किट झाल्याने सुमारे १० एकर आडसाली ऊस जळून गेला आहे. हि घटना दि ११ ऑक्टोबर २०२६ रोजी दुपारी २:३० वाजण्याच्या सुमारास घडली.

पिंपळसुटी (ता.शिरुर) येथे हा प्रकार घडला असुन विद्युत वाहिनीची तार तुटून शॉर्टसर्किट झाल्याने सुमारे १० एकर आडसाली ऊस जळाल्याने येथील शेतकऱ्यांचे लाखों रुपयांचे नुकसान झाले आहे. याबाबत रावसाहेब यशवंत फराटे, (वय ६०), रा. पिंपळसुटी, ता. शिरूर, जि. पुणे यांनी शिरुर पोलीस स्टेशन अंतर्गत येणाऱ्या मांडवगण फराटा येथील पोलिस चौकीत तक्रार दखल केली आहे.

रावसाहेब फराटे गट नं २७० मधील ८५ आर क्षेत्रातील आडसाली ऊस तसेच त्यांच्या नातेवाईकांच्या गट नं. २७० व २७१ मधील ऊसाला आग लागली. सदर आगीत गट नं. २७० मधील एकूण ३४० आर व गट नं. २७१ मधील ६० आर, असा एकूण ४०० आर (सुमारे १० एकर) ऊस जळून नुकसान झाल्याचे तक्रारीत नमुद करण्यात आले आहे.

शेतातून गेलेल्या महावितरणच्या मुख्य विद्युत वाहिनीची तार तुटल्याने शॉर्टसर्किट होऊन आग लागल्याचा प्राथमिक अंदाज असुन जमीन मालक शेतकरी आणि स्थानिक नागरिकांनी आग विझविण्याचा प्रयत्न केला; मात्र आगीची तीव्रता जास्त असल्याने ऊस जळून मोठे नुकसान झाले. या घटनेचा पुढील अधिक तपास पोलीस हवालदार संपत खबाले हे करत आहेत.