Tathawade Protest – मुबंई बंगलोर महामार्गावरुन जिंजर हॉटेल जवळून ताथवडे गावाकडे जाणाऱ्या (गाडा)रस्त्यावर असलेल्या महापालिकेच्या वाहनतळ आरक्षणच्या जागेत सुरू असलेल्या कचरा संकलन केंद्रामुळे निर्माण झालेल्या दुर्गंधी,मच्छर माशांच्या त्रासामुळे आरोग्याच्या समस्या निर्माण झाल्या आहेत. नागरिकांच्या जिवाशी खेळणारे हे संकलन केंद्र तत्काळ बंद करण्याच्या मागणीसाठी हजारों स्थानिक रहिवाशांनी एकत्र येत मानवी साखळी आंदोलन केले.

शनिवारी (दि. १८) सकाळी दहा वाजता परिसरातील आठशे ते हजार रहिवाशांनी एकत्र येत मानवी साखळी धरून महापालिका प्रशासनाचे लक्ष वेधले. या कचरा संकलन केंद्रामुळे परिसरात असह्य दुर्गंधी पसरत असून नागरिकांच्या आरोग्यावर विपरीत परिणाम होत आहे. या भागात अनेक शैक्षणिक संस्था व इंग्रजी माध्यमाच्या शाळा असल्याने विशेषतः लहान मुले, ज्येष्ठ नागरिक आणि महिलांना या दुर्गंधीयुक्त वासाचा व आरोग्याचा फटका बसत आहे.

किंबहुना याठिकाणी डास व माशांचा प्रादुर्भाव वाढल्याने संसर्गजन्य आजारांचा धोका निर्माण झाला असून रहिवासी नित्याच्या दुर्गंधीयुक्त वासाने हैराण झाले आहेत. हे संकलन केंद्र लोकवस्तीतून तत्काळ इतर ठिकाणी मोकळ्या जागेत स्थलांतरित करावे अन्यथा यापुढे “रास्ता रोको”आंदोलन छेडण्यात येईल असा इशारा आंदोलकांनी दिला. या आंदोलनात नगरसेवक कुणाल वाव्हळकर, यांच्यासह विविध रहिवासी सोसायट्याचें प्रतिनिधी,चेअरमन सेक्रेटरी, आयटीयन्स, शालेय विद्यार्थी व पालक सहभागी झाले होते.

अन नगरसेवकांचा काढता पाय…
यावेळी आक्रमक आंदोलकांनी स्थानिक नगरसेवकांना हे कचरा केंद्र केव्हांपर्यत स्थलांतरित होईल ? यासाठी एक मुदत व अंतिम डेड लाईन द्या ! अशी एकमुखी मागणी केली. त्यास रहिवाशांनी आग्रह केला असता सत्ताधारी स्थानिक नगरसेवकांनी मोशीच्या दुर्घटनेचे कारण सांगून या आंदोलनातून काढता पाय घेतला..त्यामुळे नगरसेवकांची ही पळवाट काढण्याची भूमिका उपस्थित नागरिकांमध्ये चर्चेचा विषय ठरली.

“कचरा संकलन केंद्राबाबत महापौर व आयुक्तांनी पुढील काही दिवसात ठोस भूमिका न घेतल्यास येथील नागरिक रस्त्यावर उतरल्याशिवाय राहणार नाही. त्यामुळे प्रशासनाने तत्काळ याबाबत कार्यवाही करावी अन्यथा शिवसेना रस्त्यांवर उतरून शिवसेना स्टाईल आंदोलन करील.”
– श्रीकांत नवले ( शहरप्रमुख – शिवसेना वैद्यकीय कक्ष पिंपरी चिंचवड)