Tata Motors Demerger: वाहन उद्योगातील मोठी कंपनी टाटा मोटर्स (Tata Motors) च्या बहुचर्चित ‘डिमर्जर’ (विभाजन) प्रक्रियेला आता मूर्त स्वरूप आले असून, व्यावसायिक वाहन युनिटच्या (Commercial Vehicle Unit) शेअरची ट्रेडिंग लवकरच सुरू होण्याची शक्यता आहे. कंपनीच्या वतीने बॉम्बे स्टॉक एक्सचेंज (BSE) आणि नॅशनल स्टॉक एक्सचेंज (NSE) मध्ये लिस्टिंगसाठी अर्ज दाखल करण्यात आला आहे. सर्व प्रक्रिया सुरळीत पार पडल्यास, नोव्हेंबर अखेरपर्यंत किंवा डिसेंबरच्या सुरुवातीला हे शेअर गुंतवणूकदारांसाठी खुले होतील, अशी अपेक्षा आहे.

नामांतराला अधिकृत मंजुरी –
टाटा मोटर्सच्या व्यावसायिक वाहन युनिटने (TMLCV) आता अधिकृतपणे आपले नामांतर केले आहे. स्टॉक एक्सचेंजला दिलेल्या माहितीनुसार, TML Commercial Vehicles Ltd. चे नाव आता ‘Tata Motors Limited’ असे करण्यात आले आहे. ‘Composite Scheme of Arrangement’ अंतर्गत हा बदल करण्यात आला असून, कंपनीला २९ ऑक्टोबर २०२५ रोजी या नवीन नावाने ‘Certificate of Incorporation’ प्राप्त झाले आहे. याचा अर्थ आता एका बाजूला ‘Tata Motors Passenger Vehicles Ltd. (TMPV)’ प्रवासी वाहनांचे (उदा. Nexon, Harrier) व्यवसाय सांभाळेल, तर दुसऱ्या बाजूला ‘Tata Motors Limited’ (पूर्वीची TMLCV) ट्रक आणि बस यांसारख्या व्यावसायिक वाहनांची जबाबदारी घेईल.

गुंतवणूकदारांना १:१ प्रमाणात शेअर क्रेडिट –
टाटा मोटर्सचे विभाजन (Demerger) १ ऑक्टोबर २०२५ पासून लागू झाले आहे. कंपनीने १४ ऑक्टोबर २०२५ ही रेकॉर्ड डेट निश्चित केली होती. या तारखेनुसार, जुन्या टाटा मोटर्सच्या प्रत्येक शेअरवर गुंतवणूकदारांना व्यावसायिक वाहन युनिटचा (आताची Tata Motors Ltd.) १:१ या प्रमाणात नवा शेअर मिळाला आहे.

उदाहरणार्थ: तुमच्याकडे जुने १०० शेअर असल्यास, आता तुमच्याकडे टाटा मोटर्स पॅसेंजर व्हेइकल्सचे १०० आणि टाटा मोटर्स (कॉमर्शियल व्हेइकल्स) चे १०० असे एकूण २०० शेअर जमा झाले आहेत. हे नवीन शेअर १६ ऑक्टोबर रोजी गुंतवणूकदारांच्या डिमॅट खात्यात जमा (क्रेडिट) झाले आहेत.

ट्रेडिंगवर ‘फ्रीज’, लवकरच होणार सुरू –
गुंतवणूकदारांच्या खात्यात शेअर क्रेडिट झाले असले तरी, ते सध्या ‘फ्रोजन’ (ट्रेडिंगसाठी बंद) स्थितीत आहेत. कंपनीने बीएसई आणि एनएसईकडे लिस्टिंगसाठी अर्ज केला आहे. साधारणपणे, अशा प्रक्रियेला ४५ ते ६० दिवसांचा कालावधी लागतो. एक्सचेंजकडून मंजुरी मिळताच लिस्टिंगची तारीख जाहीर केली जाईल आणि त्यानंतर हे शेअर ट्रेडिंग ॲपवर दिसू लागतील आणि त्यांची खरेदी-विक्री सुरू होईल.