नवी दिल्ली – तीव्र पाणीटंचाईचा सामना करत असलेले कर्नाटक सरकार कावेरी नदीचे पाणी तामिळनाडुला सोडण्यास असमर्थ आहे, त्यामुळे आम्ही तामिळनाडुला एक थेंबही पाणी सोडणार नाही असे कर्नाटकचे मुख्यमंत्री सिद्धरामय्या यांनी म्हटले आहे. ते म्हणाले की केंद्राने आम्हाला तसे करण्यास सांगितले तरीही ते तामिळनाडूला पाणी सोडण्याच्या स्थितीत नाहीत.

कर्नाटक सरकार कावेरी नदीतून तामिळनाडूला पाणी सोडत असल्याच्या भाजपच्या आरोपांचे त्यांनी जोरदार खंडन केले. कर्नाटकचे मुख्यमंत्री म्हणाले, भाजप जे म्हणत आहे ते सर्व खोटे आहे, आमच्याकडे पाणी असेल तरच आम्ही पाणी सोडू शकतो. जेव्हा आमच्याकडे सोडण्यासाठी पाणी नाही, तेव्हा आम्ही पाण्याचा एक थेंबही कोणाला देण्याचा प्रश्‍नच उद्‌भवत नाही.

स्थानिक वृत्तानुसार, कर्नाटकात राज्यभरातील अनेक गावांमधील पाण्याचे स्रोत आटले आहेत. भूगर्भातील पाणी कमी झाल्याने आणि राजधानी शहरातील ३००० हून अधिक बोअरवेल कोरड्या पडल्याने ही समस्या आणखी वाढली आहे.

राज्यात गेल्या वर्षीच्या तुलनेत यंदा अधिक तीव्र उन्हाळा असल्याने, हवामान खात्याच्या अधिकाऱ्यांच्या म्हणण्यानुसार, अंदाजे ७०८२ गावे आणि ११९३ वॉर्ड, ज्यात बेंगळुरू शहरी जिल्ह्याचा समावेश आहे, पाणी टंचाईच्या सावटाखाली आहेत.