Vaibhav Mangle : पुण्यातील विद्यानंद बापट हे महाराष्ट्रभर चर्चेचा विषय ठरले आहेत. गणेशोत्सवात डीजेच्या वापराला विरोध करत पारंपरिक वाद्यांचा पुरस्कार करणारी त्यांची रोखठोक भूमिका चांगलीच चर्चेत आली. बापट यांच्या भूमिकेला अनेकांनी समर्थन दिलं असलं, तरी काहींनी त्याला कडाडून विरोधही केला आहे. सोशल मीडियावरही त्यांच्या भूमिकेवरून मतमतांतरे पाहायला मिळत आहेत.

याचदरम्यान मराठी मनोरंजन विश्वातील अभिनेता वैभव मांगले यांनी फेसबुकवर केलेल्या काही पोस्टमुळे चर्चेला आणखी उधाण आलं आहे. वैभव मांगले यांनी आपल्या पहिल्या पोस्टमध्ये लिहिलं, “भले त्यांचं बोलणं छापील वाटतं. पण ते परिणामकारक आहे. काहीही विषयांतर करायचा प्रयत्न करा, मी तेच बोलणार जे मुद्द्याचं आहे. शाब्बास!”

तर दुसऱ्या पोस्टमध्ये त्यांनी म्हटलं, “कोकणातलं टॅलेंट पुण्यात धुमाकूळ घालतयं… हा केवळ विनोद समजावा…” वैभव मांगले यांनी या पोस्टमध्ये कुणाचंही नाव घेतलेलं नाही. मात्र, त्यांच्या पोस्टचा संबंध विद्यानंद बापट यांच्याशी जोडला जात असून, नेटकऱ्यांकडून विविध प्रतिक्रिया दिल्या जात आहेत. काही नेटकरी वैभव मांगले यांना थेट नाव घेऊन भूमिका मांडण्याचा सल्ला देत आहेत, तर काहींनी त्यांना बापट यांना थेट पाठिंबा जाहीर करण्यास सांगितलं आहे. त्यामुळे मांगले यांच्या या पोस्ट सध्या चर्चेचा विषय ठरत आहेत.

दरम्यान, पुण्यातील नारायण पेठेत राहणाऱ्या विद्यानंद बापट यांच्या शुद्ध आणि अस्खलित मराठीची सोशल मीडियावर मोठ्या प्रमाणात चर्चा सुरू आहे. त्यांच्या बोलण्याच्या शैलीवर आधारित अनेक मीम्सही सोशल मीडियावर व्हायरल होत आहेत. काही दिवसांपूर्वी माध्यमांशी संवाद साधताना बापट यांनी एका श्लोकाचा उल्लेख केला होता. त्यानंतर ते चर्चेत आले. सध्या राजकीय वर्तुळापासून सोशल मीडियापर्यंत विद्यानंद बापट यांच्या वक्तव्यांची आणि त्यांच्या अस्खलित मराठीची चर्चा होताना दिसत आहे. त्यातच वैभव मांगले यांच्या नाव न घेता केलेल्या पोस्टमुळे या चर्चेला आणखी रंग आला आहे.

Festival LED laser light: काही तासांचा झगमगाट डोळ्यांवर भारी? गणेशोत्सवातील लेझर-LED लाइट्सबाबत तज्ज्ञांचा इशारा