Talegaon Dabhade News – तळेगाव दाभाडे मधील ५२८ कुटुंबाना हक्काची घरे मिळणार आहेत. प्रधानमंत्री आवास योजना-शहरी २.०’ अंतर्गत ११४ कोटींच्या खर्चाने की घरे उभारली जात असून तळेगाव दाभाडे शहरातील सर्वसामान्य आणि गरजू नागरिकांचे हक्काच्या घराचे स्वप्न आता सत्यात उतरणार आहे, अशी माहिती आमदार सुनील शेळके यांनी दिली आहे. २३ फेब्रुवारी २०२६ रोजी नवी दिल्ली येथे गृहनिर्माण आणि शहरी व्यवहार मंत्रालयाच्या सचिवांच्या अध्यक्षतेखाली केंद्रीय मंजुरी आणि देखरेख समितीच्या (CSMC) सहाव्या बैठकीत देशभरातील २.८८ लाख अतिरिक्त घरांच्या बांधकामाला मंजुरी देण्यात आली. त्यामध्ये तळेगाव दाभाडे शहरातील सुमारे ५२८ घरकुलांचा समावेश असून ११४ कोटी रुपयांची प्रशासकीय मान्यता या प्रकल्पाला मिळाली आहे. या योजनेमुळे केवळ घरकुल उपलब्ध होणार नाही, तर शहराच्या पायाभूत सुविधांनाही मोठी चालना मिळणार असल्याचे आमदार शेळके यांनी सांगितले. यामुळे पहिल्याच टप्प्यात नगराध्यक्ष व नगरसेवकांसाठीही ही मोठी विकासाची भेट ठरली असून सर्वसामान्य नागरिकांच्या जीवनमान उंचावण्याचा मार्ग मोकळा केला आहे. तळेगाव दाभाडे नगरपरिषद हद्दीतील नागरिकांना हक्काचे घर मिळण्याचा मार्ग अधिकृतपणे मोकळा झाला आहे. शासन निकषांनुसार आर्थिकदृष्ट्या दुर्बल घटकातील नागरिकांचा सर्व्हे करून दि. २६ डिसेंबर २०२५ रोजी प्रस्ताव सादर करण्यात आला होता. शहरातील साधारण २५०० नागरिकांनी अर्ज दाखल केले असून त्यापैकी सद्यस्थितीत ५६८ लाभार्थ्यांना घरकुलाचा लाभ मिळणार आहे. सुमारे ४२० चौ. फुटांचे हे घर असणार आहे. केवळ घरकुलच नाही, तर रस्ते, पाणी आणि इतर पायाभूत सुविधांनाही यामुळे चालना मिळणार आहे. प्रस्ताव: शासन निकषांनुसार आर्थिकदृष्ट्या दुर्बल घटकांचा सर्व्हे करून २६ डिसेंबर २०२५ रोजी हा प्रस्ताव सादर करण्यात आला होता.
