Yashwantnagar News : दिवाळीचा आनंद केवळ स्वतःपुरता मर्यादित न ठेवता समाजातील वंचित व गरजू घटकांसोबत सणाचा आनंद वाटून घेण्याच्या सामाजिक बांधिलकीतून तळबीड पोलिसांनी अनोखा उपक्रम राबविला. (Yashwantnagar News)

तळबीड पोलीस ठाण्याचे प्रभारी अधिकारी सहाय्यक पोलीस निरीक्षक रविंद्र भोरे यांनी दिवाळी पाडव्याचा सण जिजाऊ अनाथ मुलांचे वसतिगृह, कोळे (ता. कराड) येथे अनाथ मुलांसोबत साजरा करून त्यांच्या आयुष्यात आनंदाचे क्षण फुलविले. (Yashwantnagar News)

यावेळी वसतिगृहातील चिमुकल्यांना फटाके, दिवाळीचा फराळ तसेच धान्याचे वाटप करण्यात आले. सणासुदीच्या काळात पोलिसांकडून मिळालेली प्रेमाची आणि आपुलकीची भेट पाहून मुलांच्या चेहऱ्यावर आनंद ओसंडून वाहत होता. पोलिसांच्या या अनोख्या उपक्रमामुळे अनाथ मुलांनाही दिवाळीचा सण उत्साहात आणि आनंदात साजरा करण्याची संधी मिळाली. (Yashwantnagar News)

समाजातील अनाथ, वंचित आणि गरजू मुलांनाही सण-उत्सवांचा आनंद अनुभवता यावा, त्यांच्यामध्ये आपलेपणाची भावना निर्माण व्हावी आणि आपणही समाजाचा एक महत्त्वाचा भाग आहोत, ही जाणीव त्यांना व्हावी, या उद्देशाने हा उपक्रम राबविण्यात आला. (Yashwantnagar News)

पोलीस दल म्हटले की कायदा व सुव्यवस्था, गुन्हेगारी नियंत्रण आणि नागरिकांचे संरक्षण ही कर्तव्ये डोळ्यांसमोर येतात. मात्र, या कर्तव्यांपलीकडे जाऊन समाजातील गरजू घटकांच्या सुख-दुःखात सहभागी होणारे पोलीस दलाचे हे संवेदनशील रूपही या उपक्रमातून अधोरेखित झाले. (Yashwantnagar News)

दिवाळीतील खरा प्रकाश पणत्यांमध्ये नसून तो दुसऱ्यांच्या चेहऱ्यावर फुलणाऱ्या आनंदात असतो, याची प्रचिती तळबीड पोलिसांच्या या माणुसकीच्या उपक्रमातून आली. त्यांच्या या सामाजिक उपक्रमाचे परिसरातून कौतुक होत आहे. ()Yashwantnagar News