तहव्वुर राणा गजाआड, पण मिशन सुरू ; वाचा २६/११ च्या मास्टरमाइंड्सना शोधणारी भारताची ‘ही’ ‘हिटलिस्ट’
Updated On:
Tahawwur Rana । २६/११ च्या मुंबई हल्ल्याची आठवण आजही प्रत्येक भारतीयाला हादरवून सोडते. दहशतवाद्यांनी स्वप्नांच्या शहराला रक्तरंजित केले, रस्त्यांवर गोळीबार, निष्पापांचे मृतदेह आणि देशभर टीव्ही स्क्रीनवर खिळलेल्या नजरा…जणू वेळच थांबली होती. आता, इतक्या वर्षांनंतर, या हल्ल्याचे गूढ उलगडण्याची संधी निर्माण झाली आहे.
या हल्ल्याचा एक प्रमुख सूत्रधार, तहव्वुर राणा, अखेर भारतीय ताब्यात आहे. त्याच्या साक्षीतून २६/११ च्या मागील गुपिते आणि पाकिस्तानात लपलेल्या दहशतवाद्यांचा पर्दाफाश होण्याची शक्यता निर्माण झाली आहे.
राणा कोणती गुपिते उघडू शकतो? Tahawwur Rana ।
-
हाफिज सईद, हल्ल्याचा मास्टरमाइंड
राणाचा जवळचा मित्र डेव्हिड कोलमन हेडलीने सांगितले होते की, हाफिज सईद हा हल्ल्याचा मुख्य नियोजक होता. राणाच्या चौकशीतून सईदची योजना, संवाद, प्रशिक्षण आणि दहशतवाद्यांचे ब्रेनवॉशिंग यांचे तपशील समोर येऊ शकतात. -
झाकीउर रहमान लखवी, ऑपरेशनल कमांडर
राणाच्या माहितीतून लखवीने १० दहशतवाद्यांची निवड, लक्ष्य निश्चित करणे आणि कराचीतील कंट्रोल रूममधून दिलेले आदेश यांचा खुलासा होऊ शकतो. -
सज्जाद मीर, प्रोजेक्ट मॅनेजर
हेडलीच्या साक्षीत वारंवार नाव आलेला सज्जाद मीर हल्लेखोरांना प्रशिक्षण देणारा होता. राणाला मीरसोबतच्या चर्चा आणि नियोजनाची माहिती असण्याची शक्यता आहे. -
आयएसआयचे कनेक्शन: मेजर इक्बाल
राणा पाकिस्तानच्या गुप्तचर संस्था आयएसआयची भूमिका उघड करू शकतो. मेजर इक्बालने केवळ निधीच नाही, तर हेडलीला सूचना आणि संसाधनेही पुरवली होती. राणा आयएसआय-लष्कर-दहशतवादी यांचे कनेक्शन उघडकीस आणू शकतो. -
इलियास काश्मिरी, अल-कायदाचा दुवा
हेडलीच्या मते, इलियास काश्मिरीही या कटात सामील होता. राणाच्या साक्षीतून अल-कायदा भारतात अस्थिरता कशी पसरवू इच्छित होता, हे स्पष्ट होऊ शकते. -
हेडलीचे खरे रूप
राणाचा सर्वात जवळचा मित्र असलेला हेडली अमेरिकेचा सरकारी साक्षीदार बनला होता. राणाकडे हेडलीच्या प्रत्येक हालचालीची माहिती असू शकते, ज्यामुळे त्याच्या खोटेपणाचा पर्दाफाश होऊ शकतो.
राणा : सत्याचा साक्षीदार? Tahawwur Rana ।
तहव्वुर राणा हा २६/११ च्या हल्ल्याच्या प्रत्येक टप्प्याचा साक्षीदार आहे. त्याचे भारतात प्रत्यार्पण हे तपासातील सर्वात मोठे यश मानले जात आहे. त्याच्या साक्षीतून उर्वरित दहशतवाद्यांची ओळख, त्यांची भूमिका आणि पाकिस्तानचे खोटे दावे उघड होण्याची शक्यता आहे.
भारत सरकार काय करत आहे?
राष्ट्रीय तपास संस्थेने (एनआयए) राणाविरुद्ध आधीच आरोपपत्र दाखल केले आहे. अमेरिकेतून प्रत्यार्पणानंतर त्याला तपास यंत्रणांसमोर हजर करण्यात आले आहे. सध्या राणाची कसून चौकशी सुरू असून, लवकरच मोठे खुलासे समोर येण्याची अपेक्षा आहे.
