T20 World Cup 2024 : आयसीसी टी-20 विश्वचषक 2024 अवघ्या काही दिवसांवर येऊन ठेपला आहे. अमेरिका आणि वेस्ट इंडिज या स्पर्धेचे यजमानपद भूषवणार आहेत. सर्वच संघ वर्ल्डकपच्या तयारीत व्यस्त आहेत. 1 जूनपासून सुरू होणाऱ्या विश्वचषकात एकूण 20 संघ सहभागी झाले आहेत. कॅनडा आणि युगांडा प्रथमच पुरुषांच्या T20 विश्वचषकासाठी पात्र ठरले आहेत, तर युनायटेड स्टेट्स सह-यजमान म्हणून प्रथमच सहभागी होत आहेत.

स्पर्धेसाठी सर्व संघांची घोषणा करण्यात आली असून, पहिला सामना कॅनडा आणि अमेरिका यांच्यात 1 जून रोजी होणार आहे. तर भारत 5 जूनला आयर्लंडविरुद्धच्या मोहिमेला सुरुवात करेल. त्याचबरोबर या स्पर्धेतील सर्व संघांमध्ये असे अनेक खेळाडू आहेत जे पहिल्यांदाच T20 विश्वचषक खेळणार आहेत. सर्वांच्या नजरा ‘या’ युवा खेळाडूंवर असतील. आपण, त्या 7 युवा फलंदाजांबद्दल जाणून घेणार आहोत, जे पहिल्यांदाच T20 विश्वचषक खेळणार आहेत आणि ज्याच्यात जगाला हादरवून सोडण्याची ताकद आहे.

1. यशस्वी जैस्वाल (भारत) – भारतीय क्रिकेट संघाचा 22 वर्षीय युवा फलंदाज यशस्वी जैस्वाल पहिला T20 विश्वचषक खेळत आहे. तो कर्णधार रोहित शर्मासोबत संघासाठी डावाची सुरुवात करताना दिसू शकतो. यशस्वीने गेल्या काही वर्षांत क्रिकेटच्या मैदानावर स्वत:ला सिद्ध केले आहे. आता तो 2024 च्या टी-20 वर्ल्ड कपमध्ये भारतासाठी आपला जलवा दाखवताना दिसणार आहे. जैस्वालने भारतासाठी आतापर्यंत 17 सामन्यांच्या 16 डावांमध्ये 1 शतक आणि 4 अर्धशतकांसह 502 धावा केल्या आहेत.

2. हॅरी ब्रूक (इंग्लंड) – इंग्लंड क्रिकेट संघाचा 25 वर्षीय सर्वोत्कृष्ट फलंदाज हॅरी ब्रूक 2024 च्या टी-20 विश्वचषक स्पर्धेत संघासाठी महत्त्वाचा खेळाडू ठरू शकतो. हा 25 वर्षीय फलंदाज आक्रमक फलंदाजीसाठी ओळखला जातो. ब्रूकने इंग्लंडसाठी 30 सामन्यांच्या 27 डावांमध्ये 2 अर्धशतकांच्या मदतीने 545 धावा केल्या आहेत. आता तो टी-20 विश्वचषक स्पर्धेत कहर करताना दिसू शकतो.

3. तौहीद हृदय (बांगलादेश) – बांगलादेश क्रिकेट संघाचा 23 वर्षीय युवा डावखुरा फलंदाज तौहीद हृदय या टी-20 विश्वचषकात आपली छाप पाडेल अशी अपेक्षा आहे. बांगलादेश प्रीमियर लीगमध्ये चमकदार कामगिरी केल्यानंतर त्याचा टी-20 विश्वचषक संघात समावेश करण्यात आला आहे. आता त्याला या मेगा स्पर्धेत संघासाठी अप्रतिम कामगिरी करण्याची संधी मिळणार आहे. त्याने बांगलादेशसाठी 21 टी-20 सामन्यांच्या 19 डावांमध्ये 2 अर्धशतकांसह 454 धावा केल्या आहेत.

4. विल जॅक्स (इंग्लंड) – इंग्लंडचा धोकादायक 25 वर्षीय अष्टपैलू खेळाडू विल जॅक्स या T20 विश्वचषकात बॅट आणि बॉलने कहर करू शकतो. या 25 वर्षीय खेळाडूने आतापर्यंत इंग्लंडसाठी 12 टी-20 सामन्यांच्या 12 डावात 218 धावा केल्या आहेत. याशिवाय या ऑफस्पिनरच्या नावावर 1 विकेटही आहे. यंदाच्या आयपीएल 2024 मध्ये रॉयल चॅलेंजर्स बंगळुरूचा इंग्लिश फलंदाज विल जॅक्सने गुजरात टायटन्सविरुद्ध अवघ्या 41 चेंडूत शतक झळकावले होते. विल जॅकच्या शतकाचे सर्वात मोठे वैशिष्ट्य म्हणजे त्याने शेवटच्या 83 धावा फक्त 24 चेंडूत केल्या होत्या.

5. रचिन रवींद्र (न्यूझीलंड) – न्यूझीलंड क्रिकेट संघाचा 24 वर्षीय डावखुरा स्टार फलंदाज रचिन रविंदने 20 सामन्यात 1 अर्धशतकाच्या मदतीने एकूण 214 धावा केल्या आहेत, तर त्याने 11 विकेट्स घेतल्या आहेत. हा अष्टपैलू खेळाडू न्यूझीलंड साठी महत्वाचा खेळाडू ठरू शकतो कारण त्याने 2023 च्या एकदिवसीय विश्वचषकात आपल्या खेळाने सर्वांची मने जिंकली होती. त्याने 10 सामन्यात 64.22 च्या सरासरीने 568 धावा केल्या होत्या. किवी संघ उपांत्य फेरीत पोहोचला होता आणि त्यात रवींद्रने सर्वात महत्त्वाची भूमिका बजावली होती.

6. ट्रिस्टन स्टब्स (दक्षिण आफ्रिका) – दक्षिण आफ्रिकेचा 23 वर्षीय फलंदाज ट्रिस्टन स्टब्सने संघासाठी 17 सामन्यात 1 अर्धशतकासह 239 धावा केल्या आहेत. आता या विश्वचषकात तो विरोधी संघासाठी धोकादायक ठरू शकतो. आयपीएल 2024 हंगामात 13 डावांमध्ये, स्टब्सने 54.00 च्या सरासरीने आणि 190.90 च्या स्ट्राइक रेटने तीन अर्धशतकांसह 378 धावा केल्या. त्याचा सर्वोत्तम स्कोअर नाबाद 71 आहे. तसेच तीन विकेट्स देखील घेतल्या आहेत. स्टब्सनं आयपीएलमध्ये डेथ ओव्हर्समध्ये सर्वाधिक धावा काढल्या आहेत. स्टब्सनं 16 ते 20 ओव्हर्समध्ये 252 धावा काढल्या आहेत.

7. दीपेंद्र सिंग ऐरी (नेपाळ) –  नेपाळचा 24 वर्षीय आक्रमक फलंदाज दीपेंद्र सिंग ऐरी टी-20 मध्ये एका षटकात 6 षटकार ठोकून प्रसिद्धीझोतात आला. त्याचवेळी, आशियाई क्रीडा स्पर्धेत या फलंदाजाने 9 चेंडूत अर्धशतक झळकावून युवराज सिंगचा सर्वात वेगवान अर्धशतकाचा विक्रम मोडला होता. या फलंदाजाने आतापर्यंत 64 टी20I सामन्यांमध्ये 1 हजार 626 धावा केल्या आहेत. दीपेंद्र सिंग ऐरीचा टी-20 आंतरराष्ट्रीय स्ट्राईक रेट 146.75 आहे. आता तो 2024 च्या टी20 विश्वचषकात संघासाठी धोकादायक ठरू शकतो.