T20 World Cup 2024 : विश्वचषकासाठी टीम इंडियाची घोषणा..! रोहितकडे नेतृत्व तर पांड्याकडेही महत्त्वाची जबाबदारी, पहा कोणा-कोणाला मिळाली संधी…
India’s squad for T20 World Cup 2024 announced : भारताने 2024 च्या T20 विश्वचषकासाठी संघ घोषित केला आहे. टीम इंडिया रोहित शर्माच्या नेतृत्वाखाली खेळणार आहे. भारतीय क्रिकेट नियामक मंडळाच्या निवड समितीची मंगळवारीच बैठक झाली. रोहित शर्मासोबतच यशस्वी जैस्वाल, विराट कोहली, सूर्यकुमार यादव, ऋषभ पंत आणि संजू सॅमसन यांना संघात स्थान मिळाले आहे. शुभमन गिलला राखीव खेळाडूंच्या यादीत ठेवण्यात आले आहे. बीसीसीआयने शिवम दुबेवरही विश्वास दाखवला आहे. सध्याच्या आयपीएलमध्ये मुंबई इंडियन्सचा कर्णधार असलेल्या हार्दिक पांड्याला टी-20 विश्वचषकासाठी उपकर्णधारपदाची जबाबदारी देण्यात आली आहे.
केएल राहुलला संघातून वगळण्यात आले आहे. राहुल गेल्या टी20 विश्वचषकात भारतीय संघाचा भाग होता. युझवेंद्र चहलचे संघात पुनरागमन झाले आहे. गेल्या टी-20 विश्वचषकात तो भारतीय संघाचा भाग होता. पण, एकही सामना खेळण्याची संधी मिळाली नाही. भारतीय कर्णधार रोहित शर्मा आणि मुख्य निवडकर्ता अजित आगरकर 2 मे रोजी मुंबईत पत्रकार परिषद घेऊन संघ निवडीशी संबंधित प्रश्नांची उत्तरे देतील.
टीम इंडियाने यष्टीरक्षक फलंदाज ऋषभ पंत आणि संजू सॅमसनला संघात स्थान दिले आहे. संजू सॅमसन, केएल राहुल, जितेश शर्मा, इशान किशन या खेळाडूंचा दुसऱ्या विकेटकीपरच्या शर्यतीत समावेश होता. पण, संजूने बाजी मारली आहे. सॅमसन आणि पंत आयपीएल 2024 मध्ये चमकदार कामगिरी करत आहेत. ऋषभचे प्रदीर्घ कालावधीनंतर टीम इंडियात पुनरागमन झाले आहे. कार अपघातानंतर तो मैदानापासून दूर होता. पण त्याने आयपीएलच्या माध्यमातून मैदानात पुनरागमन करत आपला फॉर्म सिद्ध केला. त्याचा फायदा त्याला झाला. सॅमसनबद्दल बोलायचे झाले तर, त्याने आयपीएल 2024 मध्ये 9 सामने खेळले आहेत आणि 385 धावा केल्या आहेत. या काळात त्याने 4 अर्धशतके झळकावली आहेत.
शिवम-अक्षरवर व्यक्त केला विश्वास…
बीसीसीआयने शिवम दुबे आणि अक्षर पटेल यांच्यावरही विश्वास व्यक्त केला आहे. शिवम आयपीएलमध्ये चेन्नई सुपर किंग्जकडून खेळत आहे. तो स्फोटक फलंदाजीत तरबेज आहे. यासोबतच तो फिनिशरचीही भूमिका निभावतो. शिवम दुबेने या मोसमात 9 सामन्यात 350 धावा केल्या आहेत. या काळात त्याने 3 अर्धशतके झळकावली आहेत. अक्षरबद्दल बोलायचे झाले तर त्याने गोलंदाजीसोबतच फलंदाजीतही उत्कृष्ट कामगिरी केली आहे.
🚨India’s squad for ICC Men’s T20 World Cup 2024 announced 🚨
Let’s get ready to cheer for #TeamIndia #T20WorldCup pic.twitter.com/jIxsYeJkYW
— BCCI (@BCCI) April 30, 2024
शुभमनला राखीव खेळाडूंच्या यादीत मिळाले स्थान…
शुभमन गिलच्या जागेबाबत साशंकता होती. मात्र, मंडळाने त्याकडे दुर्लक्ष केले नाही. शुभमनला राखीव खेळाडूंच्या यादीत स्थान मिळाले आहे. त्याच्यासोबत रिंकू सिंग, खलील अहमद आणि आवेश खान यांनाही या यादीत स्थान मिळाले आहे.
T20 विश्वचषक 2024 साठी भारतीय क्रिकेट संघ –
रोहित शर्मा (कर्णधार), हार्दिक पंड्या (उपकर्णधार), यशस्वी जैस्वाल, विराट कोहली, सूर्यकुमार यादव, ऋषभ पंत (यष्टीरक्षक), संजू सॅमसन (यष्टीरक्षक), शिवम दुबे, रवींद्र जडेजा, अक्षर पटेल, कुलदीप यादव, युजवेंद्र चहल. अर्शदीप सिंग, जसप्रीत बुमराह, मोहम्मद सिराज
राखीव खेळाडू – शुभमन गिल, रिंकू सिंग, खलील अहमद आणि आवेश खान
सतरा वर्षाची प्रतीक्षा संपणार का?
यंदा 1 जूनपासून वेस्ट इंडिज आणि अमेरिकेत टी-20 विश्वचषक स्पर्धा होणार आहे. भारत 5 जूनला न्यूयॉर्कमध्ये आयर्लंडविरुद्ध टी-20 विश्वचषक मोहिमेला सुरुवात करेल. यानंतर 9 जूनला न्यूयॉर्कमध्येच भारताचा सामना पाकिस्तानशी होणार आहे. यानंतर 12 जूनला भारताला अमेरिकेशी आणि त्यानंतर 15 जूनला कॅनडाचा सामना करायचा आहे.
भारत 17 वर्षांपासून ही ट्रॉफी जिंकण्यासाठी झगडत आहे. शेवटच्या वेळी म्हणजे 2022 मध्ये, भारत उपांत्य फेरीत इंग्लंडकडून 10 विकेट्सने पराभूत झाला होता. आता रोहित शर्माच्या नेतृत्वाखाली हे 15 खेळाडू 17 वर्षांचा टी-20 वर्ल्ड कप ट्रॉफीचा दुष्काळ संपवण्यासाठी मैदानात उतरतील. भारताने शेवटची आयसीसी ट्रॉफी 2013 मध्ये जिंकली होती. रोहित आणि कंपनीला 11 वर्षांचा ICC ट्रॉफीचा दुष्काळही संपवायचा आहे. 2023 च्या एकदिवसीय विश्वचषकात भारतीय संघ अंतिम फेरीत ऑस्ट्रेलियाकडून पराभूत झाला होता.
दरम्यान, भारतीय संघाने 2007 मध्ये शेवटचा टी-20 विश्वचषक जिंकला होता. या स्वरूपाची ही पहिली आवृत्ती होती. टी-20 विश्वचषकाची ही 9वी आवृत्ती असेल. इंग्लंड गतविजेता आहे. 2022 च्या अंतिम फेरीत पाकिस्तानला पराभूत करून त्यांनी दुसऱ्यांदा विजेतेपदावर कब्जा केला. यापूर्वी 2010 मध्ये इंग्लंड संघ चॅम्पियन बनला होता. वेस्ट इंडिजने दोनदा (2012, 2016) आणि भारत, पाकिस्तान, श्रीलंका आणि ऑस्ट्रेलियाने प्रत्येकी एकदा विजेतेपद पटकावले आहे.
स्पर्धेच्या सुरुवातीच्या सामन्यांसाठी प्रत्येकी 5 संघांची 4 गटात विभागणी करण्यात आली आहे. अ गटात भारत आणि पाकिस्तानचा समावेश आहे. ब गटात न्यूझीलंड, अफगाणिस्तान आणि वेस्ट इंडिज आहेत. ऑस्ट्रेलिया आणि इंग्लंड गट-क मध्ये आहेत तर गट-ड मध्ये बांगलादेशसह श्रीलंका, दक्षिण आफ्रिका यांचा समावेश आहे.
