T20 World Cup 2024 : इंग्लंड की दक्षिण आफ्रिका…! भारतानं उपांत्य फेरीत गाठल्यास त्यांचा सामना कोणाशी होईल, जाणून घ्या समीकरण…
T20 World Cup 2024 : सुपर-8 च्या ‘ब’ गटातून इंग्लंड आणि दक्षिण आफ्रिका उपांत्य फेरीत पोहोचले आहेत. मात्र ‘अ’ गटातूत उपांत्य फेरीत जाणाऱ्या संघाचे चित्र अद्याप स्पष्ट झालेले नाही. भारत सध्या ‘अ’ गटात अव्वल स्थानावर आहे, पण गणित केले तर या गटातील सर्व संघांना उपांत्य फेरीत जाण्याची संधी अजूनही आहे.
पण टीम इंडियाला टॉप-4 मध्ये जाण्याची सर्वाधिक शक्यता आहे कारण त्याचे 4 गुण आहेत आणि निव्वळ रन-रेट +2.425 आहे. अशा परिस्थितीत, उपांत्य फेरीत गेल्यास भारताचा सामना कोणत्या संघाशी होऊ शकतो हे जाणून घेऊया.
उपांत्य फेरीत भारताचा सामना कोणाशी होणार?
वेळापत्रकानुसार पाहिल्यास, सुपर-8 च्या ‘अ’ गटातील पहिल्या संघाचा सामना ‘ब’ गटातील दुसऱ्या संघाशी होईल. ‘ब’ गटातील अव्वल संघाचा सामना पहिल्या गटातील दुसऱ्या स्थानावरील संघाशी होईल. सुपर-8 च्या शेवटच्या सामन्यात टीम इंडिया ऑस्ट्रेलियाकडून हरली तरी कदाचित अव्वल स्थानावर राहील. ऑस्ट्रेलिया आणि अफगाणिस्तान जास्तीत जास्त 4 गुण मिळवू शकतात, परंतु भारताच्या निव्वळ धावगतीच्या पलीकडे जाणे त्यांच्यासाठी खूप कठीण आहे.
याचा अर्थ, जर भारत ‘अ’ गटात अव्वल राहिला तर त्याचा सामना ‘ब’ गटात दुसऱ्या स्थानावर असलेल्या इंग्लंडशी होईल. जर टीम इंडिया ‘अ’ गटात दुसऱ्या स्थानावर घसरली तर त्याचा सामना ‘ब’ गटातील अव्वल संघ असलेल्या दक्षिण आफ्रिकेशी होईल.
इंग्लंड आहे गतविजेता…
दरम्यान, 2022 मध्ये इंग्लंडने टी-20 विश्वचषक जिंकला होता. गतविजेतेपदाचे दडपण असतानाही इंग्लंडने पुन्हा एकदा दमदार कामगिरी करत उपांत्य फेरी गाठली आहे. सुपर-8 च्या शेवटच्या सामन्यात यूएसएचा 10 गडी राखून पराभव केल्यावर जोस बटलर आणि त्याचे खेळाडू आत्मविश्वासाने भरलेले असतील. त्यामुळे उपांत्य फेरीत भारताचा सामना इंग्लंडशी झाला तर टीम इंडियाला विजयाची नोंद करणे सोपे जाणार नाही. तर दुसरीकडे दक्षिण आफ्रिकेनेही सलग सात सामने (एकही सामना न गमावता) उपांत्य फेरीत धडक मारली आहे, त्यामुळे त्यांनाही कमी लेखणे चूकीचे ठरेल.
