Weather Update :  गेल्या काही दिवसांपासून मुंबईसह महाराष्ट्रातील अनेक भागांमध्ये तापमानात मोठी वाढ झाली आहे. ऑक्टोबर महिन्यातील वाढत्या उष्णतेमुळे नागरिक हैराण झाले असून, उन्हाच्या झळा अधिक तीव्र झाल्याचे चित्र आहे. मंगळवारी मुंबईत कमाल तापमानाची नोंद ३८ अंश सेल्सिअसपर्यंत पोहोचली. अशातच पुढील काही दिवसांत हवामानात बदल होण्याचा अंदाज हवामान विभागाने वर्तवला आहे.

मुंबई शहर आणि उपनगरांमध्ये गुरुवारपर्यंत उष्ण आणि दमट हवामान कायम राहण्याची शक्यता आहे. त्यामुळे नागरिकांना उकाड्याचा सामना करावा लागू शकतो. मात्र, राज्यातील काही भागांत हलक्या पावसाच्या सरी कोसळण्याचा अंदाज वर्तवण्यात आल्याने नागरिकांना उष्णतेपासून काहीसा दिलासा मिळण्याची शक्यता आहे.

मुंबई, ठाणे, रायगडमध्ये उष्णतेचा इशारा; काही जिल्ह्यांत पावसाची शक्यता

राज्यातील हवामानात संमिश्र बदल पाहायला मिळत आहेत. मुंबई, ठाणे आणि रायगड जिल्ह्यांत उष्णतेच्या लाटेचा इशारा देण्यात आल्याची माहिती आहे. दुसरीकडे, पुणे आणि सातारा जिल्ह्यांच्या घाटमाथ्यावरील भागांसह बीड आणि जालना जिल्ह्यांत काही ठिकाणी हलक्या पावसाच्या सरी पडण्याची शक्यता वर्तवण्यात आली आहे.

दक्षिण कोकण, पश्चिम महाराष्ट्र आणि दक्षिण मराठवाड्यात काही ठिकाणी पावसासाठी अनुकूल परिस्थिती निर्माण होत असल्याचे सांगण्यात येत आहे. त्यामुळे या भागांमध्ये पाऊस झाल्यास वाढत्या तापमानापासून नागरिकांना काहीसा दिलासा मिळू शकतो.

रत्नागिरीत पारा ३९ अंशांच्या पार

राज्यात ऑक्टोबर हिटचा प्रभाव जाणवत असून, अनेक ठिकाणी कमाल तापमानात वाढ झाली आहे. मागील २४ तासांत रत्नागिरी येथे ३९.३ अंश सेल्सिअस कमाल तापमानाची नोंद झाली. तर जळगाव येथे १७.६ अंश सेल्सिअस किमान तापमान नोंदवण्यात आले. राज्यातील बहुतांश भागांत तापमानाचा पारा ३७ अंशांच्या पुढे गेल्याने उन्हाचा तडाखा वाढला आहे.

Garlic Coconut Chutney: फक्त ‘या’ टिप्स लक्षात ठेवा! झणझणीत लसूण-खोबऱ्याची चटणी होईल एकदम खमंग; भाकरीसोबत लागेल भारी