Satara: जिल्हा पोलीस दलाच्या बॉम्ब शोधक व नाशक पथकातील (बीडीडीएस) ‘आझाद’ या श्‍वानाने राज्यस्तरीय पोलीस कर्तव्य मेळाव्यात उल्लेखनीय कामगिरी करत तीन सुवर्णपदकांसह ‘बेस्ट डॉग ऑफ कम्पिटिशन’चा मान पटकावला. या यशामुळे सातारा पोलीस दलाची मान उंचावली असून आझादची मुंबई येथे होणाऱ्या ७० व्या अखिल भारतीय पोलीस कर्तव्य मेळाव्यासाठी निवड झाली आहे.

पुणे येथे ४ ते १० ऑक्टोबरदरम्यान झालेल्या २१ व्या राज्यस्तरीय पोलीस कर्तव्य मेळाव्यात महाराष्ट्रातील विविध परिक्षेत्रे व आयुक्तालयांचे २४ संघ आणि ४७ श्‍वान सहभागी झाले होते. या स्पर्धेत आझादने आपल्या कौशल्याची छाप पाडत राज्यात अव्वल स्थान मिळवले. स्फोटक पदार्थ शोधण्याच्या प्रकारात आझादने ४०० पैकी ३५५ गुण मिळवत सुवर्णपदक पटकावले. तसेच आज्ञाधारकपणा आणि अन्न नकार या प्रकारांतही सुवर्णपदक मिळवले. याशिवाय, २०२६ पासून सुरू करण्यात आलेला ‘बेस्ट डॉग ऑफ कम्पिटिशन’ हा मानाचा किताबही आझादने आपल्या नावावर केला.

आझादची ही कामगिरी सातारा पोलीस दलासाठी विशेष अभिमानाची ठरली आहे. यापूर्वी ऑगस्टमध्ये कोल्हापूर येथे झालेल्या परिक्षेत्रीय पोलीस कर्तव्य मेळाव्यातही आझादने स्फोटके शोधण्याच्या प्रकारात सुवर्णपदक आणि ‘बेस्ट डॉग’चा किताब पटकावला होता. सातारा पोलीस दलाच्या श्‍वानपथकाने राष्ट्रीय स्तरावरही यापूर्वी आपली गुणवत्ता सिद्ध केली आहे. ६८ व्या अखिल भारतीय पोलीस कर्तव्य मेळाव्यात ‘सूर्या’, तर ६९ व्या मेळाव्यात ‘सूचक’ या श्‍वानाने महाराष्ट्र संघासाठी सुवर्णपदक मिळवले होते. आता आझादच्या यशामुळे सलग तिसऱ्या वर्षी राष्ट्रीय स्पर्धेत सुवर्णपदक मिळवण्याची परंपरा कायम राखण्याची संधी सातारा पोलीस दलाला मिळाली आहे.

 राष्ट्रीय स्पर्धेतही यशाचा विश्‍वास

आझादच्या या यशामागे त्याचे हँडलर पोलीस हवालदार रूपेश साळुंखे आणि पोलीस कॉन्स्टेबल प्रवीण आहिरे यांचे मोलाचे योगदान आहे. वरिष्ठ पोलीस अधिकारी, श्‍वान प्रशिक्षण केंद्रातील अधिकारी, प्रशिक्षक आणि बीडीडीएस पथकातील कर्मचाऱ्यांचेही मार्गदर्शन लाभले. राष्ट्रीय स्पर्धेतही सुवर्णपदक मिळवण्याचा विश्‍वास व्यक्त करत हँडलर पोलीस हवालदार रुपेश साळुंखे यांनी सातारा पोलीस दलाची यशाची परंपरा कायम ठेवण्यासाठी प्रयत्न करणार असल्याचे सांगितले.