Suspicious Drone – शिंदोडी गावात गेल्या काही दिवसांपासून रात्रीच्या वेळेस आकाशात ड्रोनसदृश्य वस्तू फिरत असल्याचे दिसून येत असल्याने ग्रामस्थांमध्ये भीती आणि संभ्रमाचे वातावरण निर्माण झाले आहे. रात्री उशिरापर्यंत आकाशात चमकणारे दिवे आणि सतत फिरणारी ही संशयास्पद वस्तू नेमकी काय आहे, याबाबत गावकऱ्यांमध्ये विविध चर्चांना उधाण आले आहे. रात्री ९ ते १२ वाजण्याच्या दरम्यान ही वस्तू गावाच्या परिसरात तसेच शेतजमिनींच्या वरुन फिरताना दिसत आहे.

काही नागरिकांनी मोबाइलमध्ये याचे व्हिडिओ चित्रीकरणही केल्याचा दावा केला आहे. मात्र, ही वस्तू अधिकृत ड्रोन आहे की अन्य काही, याबाबत अद्याप कोणतीही स्पष्ट माहिती समोर आली नाही. ग्रामीण भागात रात्रीच्या अंधारात अशा प्रकारे ड्रोन सदृश्य वस्तू फिरत असल्याने शेतकरी, महिला आणि ज्येष्ठ नागरिकांमध्ये अस्वस्थता वाढली आहे. काहींनी चोरी, रेकी किंवा अन्य बेकायदेशीर हालचालींसाठी ड्रोनचा वापर होत असल्याची शक्यता व्यक्त केली आहे.

प्रशासनाने याची गंभीर दखल घेण्याची मागणी होत आहे. काही युवकांनी या वस्तूचा मागोवा घेण्याचा प्रयत्न केला असता ती अचानक दिशा बदलून दूर निघून जात असल्याचे सांगितले जाते. त्यामुळे गूढ वस्तूबाबत अधिकच संभ्रम निर्माण झाला आहे. गावात दिवसभर चर्चा सुरु असून अनेक तर्क-वितर्कांना उधाण आले आहे.

प्रशासनाने चौकशी करण्याची मागणी…
शिंदोडी गावचे पोलीस पाटील भास्कर ओव्हाळ यांनी ग्रामस्थांच्या वतीने पोलीस प्रशासन आणि संबंधित यंत्रणांनी या प्रकरणाची तात्काळ चौकशी करुन वस्तुस्थिती स्पष्ट करावी, अशी मागणी केली आहे. रात्रीच्या वेळेस आकाशात फिरणारी ही वस्तू नेमकी कोणाची आहे, ती कोणत्या उद्देशाने वापरली जात आहे. तिच्याकडे आवश्यक परवानग्या आहेत का, याची चौकशी होणे आवश्यक असल्याचे नागरिकांचे म्हणणे आहे.