Suryakant More : विधान परिषदेने मंगळवारी एक ठराव मंजूर केला. यामध्ये राष्ट्रवादीचे(शप) नेते सूर्यकांत मोरे यांनी सभापती राम शिंदे आणि सभागृहातील सदस्यांविरोधात आक्षेपार्ह टिप्पणी केल्याबद्दल त्यांनी माफी मागावी, तसे न केल्यास त्यांना सात दिवसांच्या तुरुंगवासाला सामोरे जावे लागेल, अशी शिफारस करण्यात आली आहे. भाजपचे सदस्य प्रसाद लाड यांनी विधान परिषदेत मोरे आणि पत्रकारांशी संबंधित हे ठराव मांडले होते. दुसऱ्या एका ठरावाद्वारे, सत्य लढा या युट्यूब वाहिनीच्या माध्यमातून निराधार आरोप केल्याबद्दल पत्रकार गणेश सोनवणे, हर्षदा सोनवणे, अमोल नंदुरकर आणि अंकुश गावडे यांच्याकडूनही माफीची मागणी करण्यात आली. तसे न केल्यास या चौघांनाही पाच दिवसांच्या तुरुंगवासाला सामोरे जावे लागणार आहे. मुख्यमंत्री देवेंद्र फडणवीस यांनी म्हटले की, मोरे यांनी परिषदेचे सभापती शिंदे तसेच विद्यमान आणि माजी सदस्यांविरोधात आक्षेपार्ह टिप्पणी केली असून, वरिष्ठ सभागृहाबद्दल द्वेष आणि उपहासाचे वातावरण निर्माण केले आहे. हक्कभंग समितीने ३० दिवसांच्या तुरुंगवासाची शिफारस केली होती. मोरे यांचे वर्तन पाहता ती शिक्षा योग्यही ठरली असती. तरीही, सात दिवसांच्या तुरुंगवासाची शिक्षा देण्याचा एक सुजाण निर्णय घेण्यात आला. सभागृहाचा उद्देश कोणाला शिक्षा करणे हा नव्हता, तर या शिक्षेच्या माध्यमातून सभागृहाची प्रतिष्ठा आणि पावित्र्य अबाधित राखणे हा होता, असे फडणवीस यांनी ठामपणे सांगितले.
