बीड : बीड शहरातील उमा किरण कोचिंग क्लासेसमध्ये १७ वर्षीय विद्यार्थिनीवर लैंगिक शोषण आणि छेडछाडीचा धक्कादायक प्रकार समोर आला आहे. या प्रकरणी दोन शिक्षक, विजय पवार आणि प्रशांत खाटोकर, यांच्याविरुद्ध शिवाजीनगर पोलीस ठाण्यात भारतीय दंड संहिता (BNS) आणि पॉक्सो कायद्यांतर्गत (POCSO Act) गुन्हा दाखल झाला आहे.

या घटनेने शिक्षण क्षेत्रात खळबळ उडाली असून, राजकीय वादालाही तोंड फुटले आहे. राष्ट्रवादी काँग्रेस (शरद पवार गट) आमदार संदीप क्षीरसागर यांचे समर्थक असलेल्या आरोपी विजय पवार यांचे अनेक नेत्यांसोबतचे फोटो सोशल मीडियावर व्हायरल झाले आहेत. यावरून राष्ट्रवादी (अजित पवार गट) नेते धनंजय मुंडे यांनी क्षीरसागरांवर हल्ला चढवला, तर भाजप आमदार सुरेश धस यांनी क्षीरसागरांची पाठराखण केली आहे.

नेमकं प्रकरण काय?

पोलिसांना दिलेल्या तक्रारीनुसार, पीडित मुलीने संत भगवान बाबा उच्च माध्यमिक महाविद्यालय, खरवंडी कासार येथे अकरावीचे शिक्षण घेतले असून, एप्रिल २०२४ मध्ये ती उमा किरण कोचिंग क्लासेसमध्ये नीटच्या तयारीसाठी दाखल झाली. ती सकाळी ९ ते १२ या वेळेत उज्वल अभ्यासिकेत अभ्यासासाठी जात होती.

जुलै २०२४ पासून प्रशांत खाटोकर, जे भौतिकशास्त्र शिकवतात, त्यांनी तिला अभ्यासिकेबाहेर थांबून गाडीवर बसण्यास सांगितले. तिने नकार दिल्यावर त्यांनी तिला धमकावले. तक्रारीत मुलीने सांगितले की, खाटोकर यांनी क्लास संपल्यानंतर तिला केबिनमध्ये बोलावून चुंबन घेतले, तिच्या छातीला आणि गुप्तांगांना स्पर्श केला, तसेच कपडे काढायला लावून फोटो काढले. याशिवाय, क्लासरूममध्येही त्यांनी तिच्यावर बॅड टच केला आणि घरी सांगितल्यास जीवे मारण्याची धमकी दिली.

या प्रकरणात विजय पवार यांनाही सहआरोपी बनवण्यात आले आहे. पालकांनी पवार यांना राजकीय पाठबळ असल्याचा आरोप केला आहे. मुलीच्या पालकांनी तिच्या अस्वस्थतेचे कारण विचारले असता तिने सत्य सांगितले, ज्यानंतर गुरुवारी (२६ जून २०२५) रात्री शिवाजीनगर पोलीस ठाण्यात तक्रार दाखल झाली. दोन्ही आरोपी शिक्षक सध्या फरार असून, त्यांना पकडण्यासाठी पोलिसांनी विशेष पथक स्थापन केले आहे.

सुरेश धसांकडून क्षीरसागरांची पाठराखण

भाजप आमदार सुरेश धस यांनी संदीप क्षीरसागर यांची पाठराखण करताना सांगितले, “आरोपी विजय पवार यांचे फोटो फक्त संदीप क्षीरसागर यांच्यासोबत नाहीत, तर जिल्ह्यातील सर्वच नेत्यांसोबत आहेत. त्यामुळे सर्वांना आरोपी ठरवायचे का?” धस यांनी हा मुद्दा उपस्थित करत क्षीरसागरांवरील आरोपांचे खंडन केले. मात्र, यामुळे राजकीय वाद आणखी चिघळला आहे.

धनंजय मुंडेंचा हल्ला

राष्ट्रवादी (अजित पवार गट) नेते आणि माजी मंत्री धनंजय मुंडे यांनी बेल्सपॉल्सी आजारातून सावरल्यानंतर या प्रकरणी मौन सोडले. त्यांनी थेट क्षीरसागर यांच्यावर निशाणा साधत, “आरोपीला पाठबळ देणाऱ्यांवर कठोर कारवाई व्हायला हवी. अशा गंभीर प्रकरणात कोणालाही पाठिशी घालणे चुकीचे आहे,” असे म्हटले. धनंजय मुंडे आणि भाजप नेत्या पंकजा मुंडे यांनी बीडच्या पोलीस अधीक्षकांकडे आरोपींवर कठोर कारवाईची मागणी केली आहे.

बजरंग सोनवणे यांची प्रतिक्रिया

राष्ट्रवादी (शरद पवार गट) खासदार बजरंग सोनवणे यांनी धनंजय मुंडे यांच्या आरोपांना प्रत्युत्तर देताना म्हटले, “आरोप करणे सोपे आहे, पण त्यासाठी पुरावे असावे लागतात. गेल्या दीडशे दिवसांपासून तुम्ही गप्प का होतात?” सोनवणे यांनी मुंडे यांच्यावर पलटवार करताना या प्रकरणाला राजकीय रंग देण्याचा प्रयत्न केला. दरम्यान, संदीप क्षीरसागर किंवा त्यांच्या कार्यकर्त्यांनी अद्याप याबाबत कोणतीही अधिकृत प्रतिक्रिया दिलेली नाही.

दरम्यान, या प्रकरणाने बीड जिल्ह्यात तीव्र पडसाद उमटले आहेत. शिक्षण क्षेत्रातील लैंगिक शोषणाच्या घटनेने पालकांमध्ये भीतीचे वातावरण आहे. विजय पवार यांचे अनेक राजकीय नेत्यांसोबतचे फोटो सोशल मीडियावर व्हायरल झाल्याने या प्रकरणाला राजकीय वळण मिळाले आहे. स्थानिक नागरिकांनी आणि सामाजिक कार्यकर्त्यांनी या प्रकरणात त्वरित आणि निष्पक्ष तपासाची मागणी केली आहे. याशिवाय, कोचिंग क्लासेसच्या नियमनाबाबतही प्रश्न उपस्थित होत आहेत.